वीरगञ्ज महानगरपालिका–१७ अन्तर्गत अलौंमा नेपाली कांग्रेसको पार्टी कार्यालय उद्घाटन गरिएको छ। पर्सा क्षेत्र नम्बर २ का नेपाली कांग्रेसका उम्मेदवार अजय चौरसियाले पार्टी कार्यालय उद्घाटन गर्दै मन्तव्य राखेका थिए।
कार्यक्रममा बोल्दै चौरसियाले नेपाली कांग्रेसका सभापति गगन थापालाई वीरगञ्ज ल्याउने तयारी भइरहेको जानकारी गराए। उनले अलौं गाउँकै कारण २०५६ सालको निर्वाचनमा नेपाली कांग्रेसले ऐतिहासिक जित हासिल गरेको स्मरण गर्दै कांग्रेसको देश निर्माणमा रहेको योगदानको चर्चा गरे।
चौरसियाले प्रदेश सरकारसँग विभिन्न क्षेत्रमा विकास निर्माणका लागि बजेट विनियोजन गर्न आग्रह गरिएको बताए। कांग्रेसको जितबाट मात्रै देशले निकास पाउने र विकासको बाटो खुल्ने उनको भनाइ थियो।
उनले गगन थापाको नेतृत्वमा सरकार बनेमा आफू सांसद हुँदा विनियोजन गरिएको तर हालसम्म फुकुवा नभएको बजेट फुकुवा गराउने प्रतिबद्धता व्यक्त गरे। साथै, जमिनदारी प्रथाको अन्त्य नेपाली कांग्रेसले नै गरेको उल्लेख गर्दै अब यस क्षेत्रमा चार लेनको सडक आवश्यक रहेको र वृद्ध आश्रम निर्माण गर्ने वाचा समेत गरे।
लोकतान्त्रिक व्यवस्थालाई मजबुत बनाउन कांग्रेसको जित अपरिहार्य रहेको बताउँदै उनले नयाँ पार्टी र नयाँ नेतृत्वसँग जनताले “तपाईंहरूको पार्टीको उद्देश्य के हो, योगदान के हो र किन हामीले मतदान गर्ने ?” भन्ने प्रश्न गर्नुपर्ने आवश्यकता औंल्याए।
उद्घाटन कार्यक्रममा कांग्रेस केन्द्रीय सदस्य रामरूप कुर्मी, ओमप्रकाश शर्मा, जिल्ला सभापति अशोक गुप्ता, मनेन्द्रलाल नेपाली, रोशन लामिछाने, हरिनारायण यादव, सञ्जय गुप्ता लगायतका नेताहरूको उपस्थिति रहेको थियो।
