पर्सा — राष्ट्रिय स्वतन्त्र पार्टी (रास्वपा) पर्साले क्षेत्र नं १ का सक्रिय सदस्यहरूसँग भेटघाट तथा अन्तरक्रिया कार्यक्रम सम्पन्न गरेको छ।
कार्यक्रममा पर्साका चारै निर्वाचन क्षेत्रमा पार्टीका उम्मेदवारहरूलाई विजयी गराउन सक्रिय सदस्यहरूको भूमिका के कस्तो हुनुपर्ने भन्ने विषयमा गहन छलफल तथा अन्तरक्रिया गरिएको थियो। छलफलका क्रममा विभिन्न तह र तप्काबाट आएका सहभागीहरूले फरक–फरक दृष्टिकोण र सुझावहरू प्रस्तुत गरेका थिए।
कार्यक्रममा उठेका विषयहरूलाई सम्बोधन गर्दै रास्वपा पर्सा सभापति एवं क्षेत्र नं। १ का उम्मेदवार हरि पन्तले प्राप्त भएका जायज सुझावहरू पार्टीले सहर्ष ग्रहण गर्ने बताउनुभयो। उहाँले फाल्गुन २१ गते नेपाली जनताले वर्षौँदेखि समाजमा जरा गाडेर बसेको भ्रष्टाचार, कुशासन, अनियमितता, नातावाद र कृपावादविरुद्धको विद्रोहलाई मतपेटिकामार्फत जवाफ दिने विश्वास व्यक्त गर्नुभयो।
सभापति पन्तले कार्यक्रममा पार्टी सदस्यहरूको उल्लेखनीय उपस्थिति आफू र पार्टीका लागि हौसला बनेको उल्लेख गर्दै पर्साका चारै निर्वाचन क्षेत्रमा रास्वपाको जित सुनिश्चित हुने दाबी गर्नुभयो।
सयौँ रास्वपा शुभेच्छुकहरूको सहभागिता रहेको कार्यक्रममा जिल्ला सचिव सुदिश प्रजापति, क्षेत्रीय सभापति राम आर्या, फैयाद मियाँलगायत नेताहरूको उपस्थिति रहेको थियो। सहसचिव कृष्ण पास्वानले सञ्चालन गर्नुभएको उक्त कार्यक्रम महानगर सभापति अमन आलमको सभापतित्वमा सम्पन्न भएको थियो।
