वीरगंज। वीरगंज महानगरपालिका–३२ स्थित सातो माई मन्दिर परिसरमा खानेपानीको समस्या समाधान गर्न उपकार सेवा नेपालको पहलमा वाटर पम्प जडान गरिएको छ।
स्थानीय बासिन्दा र भक्तजनलाई शुद्ध र सुलभ पानी उपलब्ध गराउने उद्देश्यसहित उक्त पम्प मन्दिर व्यवस्थापन समितिलाई एक औपचारिक कार्यक्रममार्फत हस्तान्तरण गरिएको हो।
कार्यक्रममा उपकार सेवा नेपालकी अध्यक्ष विद्या कुमारी सरावगी, समाजसेवी प्रमिला देवी, प्रतिमा शाह, सामाजिक अभियन्ता प्रकाश थारू तथा जनमत पार्टी पर्साका जिल्ला संयोजक ओमप्रकाश सर्राफको उपस्थिति रहेको थियो।
अध्यक्ष सरावगीले धार्मिक स्थलहरूमा खानेपानी, सरसफाई र वातावरणीय सुधारमा संस्था निरन्तर क्रियाशील रहने बताइन्। स्थानीय समाजसेवी प्रमिला देवीले यो सहयोगले मन्दिर आउने श्रद्धालु तथा स्थानीय बासिन्दालाई राहत मिल्ने भन्दै संस्थाप्रति आभार व्यक्त गरिन्।
सहभागीहरूले उपकार सेवा नेपालको यो पहललाई दीर्घकालीन समाधानका रूपमा लिँदै सराहना जनाएका थिए। कार्यक्रममा पानीको महत्व र सरसफाईप्रति सचेत रहन आग्रह समेत गरिएको थियो।
