बारा — बाराको कलैया उपमहानगरपालिका–१४ बघवनमा पुरानो रिसिबाट ५० वर्षीय नन्दु राउत कुर्मीलाई कुटपिट गरी हत्या गरेको आरोपमा प्रहरीले एक महिलासहित चार जनालाई पक्राउ गरेको छ।
पक्राउ पर्नेहरूमा २८ वर्षीय दिगम्बर साह कलवार, ३८ वर्षीया रञ्जु जयसवाल (उमेश जयसवालकी पत्नी), उनका दुई छोराहरू २० वर्षीय सुमित जयसवाल र १८ वर्षीय सुजित जयसवाल रहेका छन्।
प्रहरीका अनुसार, जेठ २९ गते साँझ ६:१५ बजे कुर्मीलाई स्थानीय उमेश जयसवालसहित ६ जनाको समूहले कुटपिट गरी गम्भीर घाइते बनाएको थियो। उपचारका क्रममा कलैयास्थित प्रादेशिक अस्पतालमा उनको साँझ ७:२० बजे मृत्यु भएको थियो।
घटनापछि प्रहरीले दिगम्बरलाई तत्कालै घटनास्थलबाट पक्राउ गरेको थियो। अन्य फरार अभियुक्तको खोजी गर्ने क्रममा कलैया–५ स्थित सागर लामिछानेको घरमा लुकेर बसेकी रञ्जु जयसवाल र पर्साको वीरगञ्ज महानगरपालिका–१ शान्तिटोलस्थित बसिर मियाँको घरमा रहेका उनका दुई छोराहरू सुमित र सुजितलाई बुधबार पक्राउ गरिएको हो।
घटनामा संलग्न मुख्य अभियुक्त उमेश जयसवालसहित दुई जना अझै फरार छन् र खोजी कार्य जारी रहेको जिल्ला प्रहरी कार्यालय बाराले जनाएको छ।
