पर्सा — ऐतिहासिक र धार्मिक सम्पदाले भरिपूर्ण वीरगन्जलाई सरकार र पर्यटन बोर्डले निरन्तर बेवास्ता गरेको भन्दै वीरगन्ज महानगरपालिकाका मेयर राजेशमान सिंहले कडा गुनासो गरेका छन्।
शनिबार नेपाल पर्यटन बोर्डद्वारा आयोजित ‘मधेस टुरिज्म मिट–२०२५’ मा प्रमुख अतिथिका रूपमा बोल्दै मेयर सिंहले वीरगन्जको ऐतिहासिक पहिचान र पर्यटकीय सम्भावनामाथि केन्द्र सरकारको चासो नपुगेकोमा गहिरो असन्तुष्टि व्यक्त गरे।
“१ सय ३७ वर्ष पुरानो नेपालकै एक मात्र नृसिंह मन्दिर, चौमुखी शिवलिंगसहितको ऐतिहासिक पशुपतिनाथ मन्दिर, र पर्सा राष्ट्रिय निकुञ्जजस्ता गहना हामीसँग छन्,” उनले भने, “तर पर्यटन बोर्डको नजर अझै पनि काठमाडौं, पोखरा र चितवनमा मात्र सीमित छ।”
‘मुकाम’ नामक पुस्तकबाट पहिचान संरक्षणको प्रयास
सरकारको उपेक्षा बीच वीरगन्ज महानगरले आफ्नै प्रयासमा धार्मिक, पौराणिक र ऐतिहासिक सम्पदाको संरक्षण र प्रवर्द्धन गरिरहेको जानकारी दिंदै मेयर सिंहले ‘मुकाम’ नामक पुस्तक सार्वजनिक गरेका छन्, जसले पर्सा, बारा, रौतहट जिल्लाका पर्यटकीय क्षेत्रको व्यापक जानकारी दिन्छ।
अन्य वक्ताहरूको भनाइ: मधेस ओझेलमा, समन्वयको खाँचो
कार्यक्रममा ठोरी गाउँपालिकाका अध्यक्ष लालबहादुर श्रेष्ठले ठोरीजस्तो ऐतिहासिक थलो सरकारी लगानी अभावमा ओझेलमा परेको बताए।
नेपाल पर्यटन बोर्डका वरिष्ठ निर्देशक हिक्मतसिंह ऐरले मधेसमा असीम सम्भावना रहेको भन्दै समन्वय र सहकार्यमा जोड दिए।
नेपाल उद्योग वाणिज्य महासंघ मधेश प्रदेशका अध्यक्ष अशोककुमार टेमानीले भारतीय पर्यटकलाई लक्षित गरी मधेसलाई गन्तव्यको रूपमा विकास गर्नुपर्ने बताए।
टुरिजम एसोसिएसन बिहार भारतका अध्यक्ष एसके शर्माले नेपाल–भारत धार्मिक पर्यटन सहकार्यले क्षेत्रीय पर्यटनमा क्रान्ति ल्याउन सक्ने धारणा राखे।
