वीरगञ्ज, जेठ २२ — विश्व वातावरण दिवस २०८२ को अवसरमा प्रकृति सेवा प्रतिष्ठान नेपालले श्री शारदा माध्यमिक विद्यालयको सहकार्यमा वीरगञ्ज–२४ बहुअरीमा वृहत वृक्षारोपण कार्यक्रम सम्पन्न गरेको छ।
कार्यक्रममा संस्थापक अध्यक्ष सरदार जसपाल सिंह, विद्यालयका प्रधानाध्यापक अनिल बर्णवाल, र प्रमुख अतिथि समाजसेवी प्रकाश उपाध्यायले संयुक्त रूपमा निम, बेल, अमला, अर्जुन, गोल्डमोहर, लिची, जामुन लगायत ७५ वटा रुख बिरुवा रोपेर शुभारम्भ गरेका थिए।
उपस्थित अतिथि, शिक्षक, विद्यार्थी तथा प्रतिष्ठानका पदाधिकारीहरूको सक्रिय सहभागिता रहेको कार्यक्रममा “धरतीलाई बचाऔं, वातावरणलाई जोगाऔं” भन्ने मूल सन्देश प्रवाह गरिएको थियो।
संस्थाका अध्यक्ष सिंहले ५ दिने कार्यक्रम अन्तर्गत सरसफाइ, साइकल रैली र वृक्षारोपणमार्फत जनचेतना फैलाउने उद्देश्यसहित गरिएको अभियानमा सहभागी सबैप्रति आभार व्यक्त गरे।
