बारा – बारा जिल्लाको नौतन चोकबाट एक मानसिक रूपमा असक्त व्यक्तिको उद्धार गरी मानवसेवा आश्रम वीरगञ्ज शाखामा सुरक्षित राखिएको छ। आइतबार दिउँसो करिब अढाइ बजे उद्धार गरिएको अन्दाजी ४५ वर्षीय पुरुषले आफूलाई ठाकुरजी भन्ने गरेको जानकारी प्राप्त भएको छ।
उक्त उद्धार कार्यमा मानवसेवा आश्रम वीरगञ्जका संस्थापक देवेश गुप्ता, सामाजिक अभियन्ता प्रकाश थारु, इलाका प्रहरी कार्यालय प्रर्सौनीका इन्सपेक्टर टुपेन्द्र श्रेष्ठ, नगर प्रहरी समसुल मिया धोबी र स्थानीयको सक्रिय सहभागिता रहेको थियो।
उद्धारपछि ठाकुरजीलाई वीरगञ्जस्थित मानवसेवा आश्रममा लगिएको छ, जहाँ सरसफाइ र प्रारम्भिक स्वास्थ्य परीक्षणपछि डा. भरत गोईज्यूको निगरानीमा औषधी उपचार थालिनेछ।
मानवसेवा आश्रमले विगतदेखि नै सडकमा बेवारिसे, असहाय, मानसिक रूपमा असन्तुलित तथा पीडित व्यक्तिहरूको उद्धार गर्दै समाजिक उत्तरदायित्वको अनुकरणीय उदाहरण प्रस्तुत गर्दै आएको छ।
स्थानीय बासिन्दा र सहभागीहरूले आश्रमको यो कार्यप्रति गहिरो सम्मान व्यक्त गरेका छन्।
