वीरगञ्ज, ११ कात्तिक । सङ्घीय खानेपानी मन्त्री प्रदीप यादवले शिक्षालाई केवल प्रमाणपत्र नभई जीवन बुझ्ने र समाधान खोज्ने सीपको रूपमा लिनुपर्ने बताउनुभएको छ ।
आइतबार वीरगञ्जस्थित ओम नेशनल एकेडेमीद्वारा आयोजित कक्षा ११ का विद्यार्थीहरूको स्वागत कार्यक्रमलाई सम्बोधन गर्नुहुँदै मन्त्री यादवले विद्यार्थीहरूलाई अनुशासन, मेहनत र आत्मविश्वासका साथ आफ्नो लक्ष्य हासिल गर्न प्रेरित गर्नुहुँदै शिक्षालाई केवल प्रमाणपत्र नभई जीवन बुझ्ने र समाधान खोज्ने सीपको रूपमा लिनुपर्ने बताउनु भएको हो । “विद्यार्थी जीवनमा आफूभित्रको नेतृत्व क्षमता र सृजनशीलता विकास गर्न विशेष ध्यान दिनुपर्छ,” मन्त्री यादवले भन्नुभयो ।
उहाँले विद्यार्थीहरूलाई शुभकामना दिँदै विद्यालयले दिएको ज्ञान र जीवन पाठले आगामी जीवनको हरेक मोडमा मार्गदर्शन रूपमा प्रयोग गर्न आग्रह गर्नुहुँदै चुनौतीहरूको सामना गर्दै देश र समाजको सेवा गर्ने सोच राख्न सुझाव दिनुभयो ।
मन्त्री यादवले विदेशमा मात्रै अवसर नखोजेर देशमै केही नयाँ गर्न युवाहरूले अग्रसरता लिनुपर्नेमा जोड दिनुभयो । “तपाईँहरूको सोच र मेहनतले देशको भविष्य निर्माणमा ठूलो योगदान पुर्याउन सक्छ,” उहाँले भन्नुभयो ।
जनता समाजवादी पार्टी ९जसपा० का उपमहासचिव समेत रहनुभएका मन्त्री यादवले विद्यालय र अभिभावकहरूको योगदानप्रति आभार प्रकट गर्नुहुँदै विद्यार्थीहरूलाई सफल शैक्षिक यात्रा तय गर्न शुभकामना पनि व्यक्त गर्नुभयो ।
कार्यक्रममा वीरगञ्जका मेयर राजेशमान सिंहले विद्यालय र अभिभावकहरूको योगदानको प्रशंसा गर्दै विद्यार्थीहरूलाई आफ्नो अध्ययनसँगै समाजप्रति जिम्मेवार हुन र नेतृत्वको भूमिकामा सहभागी हुन प्रेरित गर्नुभयो ।
कार्यक्रममा विद्यालयका विद्यार्थी, शिक्षकहरू र अभिभावकहरूको उत्साहजनक उपस्थिति रहेको थियो ।
