जनकपुर । राष्ट्रपति रामचन्द्र पौडेलले सोमबार जनकपुरस्थित जानकी मन्दिरमा विशेष पूजापाठ गरेका छन् । नेपाली सेनाको विमानमा बिहान जनकपुर आइपुगेका राष्ट्रपति पौडेल जनकपुर विमानस्थलबाट सोझै जानकी मन्दिर पुगेका थिए ।
जानकी मन्दिरमा राष्ट्रपति पौडेललाई मन्दिरका महन्थ रामतपेश्वर दास र उत्तराधिकारी महन्थ रोशन दासले स्वागत गरेका थिए । राष्ट्रपति पौडेललाई मन्दिरमा गर्भगृहमा महन्थ रामतपेश्वर दास आफैंले विशेष पूजापाठ गराएका थिए । अति विशिष्ठ व्यक्ति आउँदा मन्दिरको गर्भगृहमा महन्थ दासले नै पूजापाठ गराउने चलन छ ।
यसअघि, जनकपुर विमानस्थलमा राष्ट्रपति पौडेललाई मधेस प्रदेशका प्रदेश प्रमुख हरिशंकर मिश्र, मुख्यमन्त्री सरोजकुमार यादव, कांग्रेसका नेता विमलेन्द्र निधि, आनन्दप्रसाद ढुङ्गाना र रामकृष्ण यादव र एमालेकी सांसद जुली महतोले स्वागत गरेका थिए । राष्ट्रपति पौडेल जानकी मन्दिरमा विशेष पूजापाठ गरेपछि उनको सम्मानमा प्रदेश प्रमुख मिश्रले आयोजना गरेको जलपान समारोहमा सहभागी भएका थिए ।
राष्ट्रपति पौडेललाई जनकपुरधाम उपमहानगरपालिकाले अहिले अपराह्न नागरिक अभिनन्दन गर्दैछन् । लामो समयदेखि थाती रहेको नागरिकता विधेयक प्रमाणीकरण गरेको भन्दै राष्ट्रपति पौडेललाई जनकपुरधाम उपमहानगरपालिकाले नागरिक अभिनन्दन गर्न लागेको हो । जनकपुरमा निर्मित महेन्द्र नारायण निधी सांस्कृतिक भवनमा आयोजित विशेष समारोहमा राष्ट्रपति पौडेललाई नगर प्रमुख मनोज साहले नागरिक अभिनन्दन गर्ने कार्यक्रम छ ।
त्यही अवसरमा राष्ट्रपति पौडेलले २३ वर्षअघि निर्माण भएपनि उद्घाटन हुन बाँकी रहेको महेन्द्र नारायण निधि मिथिला सांस्कृतिक भवनको उद्घाटन गर्ने कार्यक्रम पनि छ । २०५७ सालमा शिलान्यास भएर निर्माण थालिएको सांस्कृतिक भवनमा नेपाल प्रहरीको दंगा गुल्मको ब्यारेक थियो । सभार : कान्तिपुर
