वीरगञ्ज, १९ असार । वीरगञ्जको चिनी मिल स्थित पशुपति मन्दीरमा आजबाट श्रावणी मेला सुरु भएको छ ।
आज पहिलो दिन जलयात्रा गरेर मेलाको सुरुवात गरिएको छ ।
वीरगञ्ज महानगरपालिका प्रमुख राजेशमान सिंहले घडिअर्वा पोखरीमा पुगेर धार्मीक विधि बमोजिम पुजा गर्नुभई जल भरेर कावड यात्राको सुरुवात गर्नु भएको थियो ।
घडिअर्वा पोखरीबाट जल भरेर निस्किएको कावड यात्रा नगर परिक्रमा पछि मन्दिरमा पुगेर समापन भएसँगै मेला सुरु भएको हो ।
वीरगञ्ज महानगरपालिका र विश्व हिन्दु परिषदको संयुक्त आयोजनामा पहिलो पटक कावड जल यात्रा सुरु गरिएको हो ।
जल यात्राको सुरुवात गर्नु हुँदै महानगर प्रमुख सिंहले वीरगञ्जलाई धार्मिक तथा सांस्कृतिक पर्यटनको गन्तव्य बनाउन महानगर लागिरहेको बताउनुभयो ।
पशुपति मन्दिरमा साउन महिनाभर मेला लाग्नुका साथै साउन महिनाको हरेक सोमबार कावड जल यात्रा निकालिने विश्व हिन्दु परिषदले जनाएको छ ।
