वीरगञ्ज,१९ चैत । पर्साको ग्रामीण भेगका विभिन्न वडामा संचालित घुम्ती स्वास्थ्य शिविरबाट ग्रामीण भेगका ६ सय भन्दा बढी महिलाहरु लाभान्वित भएका छन् ।ग्रामीण भेगका महिलाहरुलाई लक्षित गरी घरघरमै स्वास्थ्य सेवा पुर्याउने उद्देश्यले वीरगंज महानगरपालिकाले घुम्ती स्वास्थ्य शिविरको आयोजना गरेको हो ।
आयोजित घुम्ती शिविरमा खासगरी ग्रामीण भेगका महिलाहरुमा पाईने आङ्ग खस्ने समस्या , पाठेघरको मुखको क्यान्सर ,स्तन क्यान्सर, फिस्टुला तथा पाठेघर सम्बन्धि स्क्रीनीङ्ग जाँच लगायतका विभिन्न स्वास्थ्य चेकजाँच गरीएको थियो ।वीरगंज महानगरको ६ वटा वडामा संचालन गरीएको घुम्ती स्वास्थ्य शिविरबाट ६ सय ६१ महिलाहरु लाभान्वित भएका हुन् ।
शिविरमा १ सय ९ जना महिलाहरुको पाठेघरको मुखको क्यान्सर सम्बन्धि गरीएको परिक्षणमा २० जनामा गम्भिर समस्या देखीएको र १६ जना महिलाहरुमा शंकास्पद अवस्था देखीएको थियो भने ७३ जना महिलाहरुको सामान्य अवस्था चेकजाँचमा पाईएको छ ।
त्यसैगरी २९ जना महिलाहरुमा गरीएको स्तन सम्बन्धि परिक्षणमा १२ जना महिलाको अवस्था शंकास्पद देखीएको र उनीहरुलाई अस्पताल रिफर गरीएको तथा १७ जनामा सामान्य अवस्था पाईएको छ ।
त्यस्तै २४ जना महिलाहरुमा आङ्ग खस्ने समस्याबारे गरीएको चेकजाँचमा ३ जना महिलामा सुरुवाती चरण देखीएको तथा १७ जना महिलाहरुमा पहिलो र दोश्रो चरणको समस्या देखीएको थियो। त्यसैगरी ३ जना महिलामा तेश्रो चरणको समस्या देखीएको थियो भने १ जना महिलामा चौथो चरण सम्मको समस्या पाईएको डाक्टरहरुले बताएका छन् ।
त्यस्तै चेकजाँचको क्रममा ४ जना महिलाहरुमा पाठेघरको मुखमा मासु पलाएको र १४ जना महिलाहरुमा भने सिस्टोसेल सम्बन्धि समस्या पाईएको डाक्टरहरुले जनाएका छन् ।
ग्रामीण भेगका महिलाहरुको स्त्री रोग विशेषज्ञ डाक्टर प्रतीति यादव र डाक्टर दीप्ती यादवले गर्नुभएको थियो भने सहजीकरण वीरगंज महानगर वडा नम्बर २८ वगही प्राथमिक स्वास्थ्य केन्द्रकी स्टाफ नर्स रिन्कु कुमारी साहले गर्नुभएको थियो ।
वीरगंज महानगरपालिकाको स्वास्थ्य तथा सामाजिक विकास महाशाखा अन्तर्गतको जनस्वास्थ्य प्रवद्र्धन शाखाको सहकार्यमा भएको चैत्र ८ गतेदेखी सुरु भएको शिविर विभिन्न वडा हुँदै चैत्र १९ गते आईतबार सम्पन्न भएको हो ।
वीरगंज महानगरपालिका वडा नम्बर २९ बसडील्वाको स्वास्थ्य चौकीबाट सुरु भएको शिविर वडा नम्बर २८ को वगही स्वास्थ्य केन्द्रमा , वडा नम्बर २० हरपतगंजको स्वास्थ्य चौकीमा ,वडा नम्बर २६ सुगौली विर्ताको स्वास्थ्य चौकी , वडा नम्बर २४ रागढवाको स्वास्थ्य चौकीमा हुँदै वडा नम्बर २३ प्रसौनी विर्ताको स्वास्थ्य चौकीमा गरी सम्पन्न भएको हो । मधेश खबर
