वीरगञ्ज । नेशनल इन्फोटेक कलेजद्वारा आयोजित आइडियाथन कार्यक्रम सम्पन्न भएको छ । कलेजमा अध्ययनरत विद्यार्थीहरूको सहभागितामा आयोजित कार्यक्रम बुधवार सम्पन्न भएको हो ।
वर्तमान अवस्थामा देखिएका समस्याहरूलाई प्रविधि र इन्टरनेटको माध्यमबाट समाधान गर्ने परियोजनाहरू निर्माण गर्ने उद्देश्यका साथ आयोजित आइडियाथन कार्यक्रममा कुल १० वटा समूहले सहभागिता जनाएका थिए । जसमध्ये उत्कृष्ट तिन वटा परियोजनालाई पुरस्कृत समेत गरिएको थियो ।
पुरस्कृत हुनेमा प्रथम टिम एफ-५, दोस्रो टिम सान र तेस्रो टिम रेडीएन्ट वान रहेका छन् । उनीहरूलाई क्रमशः २५ हजार, २० हजार र १५ हजार रुपैयाँबाट पुरस्कृत गरिएको थियो ।
कलेजमा अध्ययनरत विद्यार्थीहरूको सहभागितामा आयोजित कार्यक्रममा काठमाडौँलगायतका स्थानबाट विज्ञ बोलाएर प्रशिक्षण गराइएको थियो । परीक्षकहरूबाट सिकेर विद्यार्थीले आफै एउटा समस्या खोजेर प्रविधि र इन्टरनेटको माध्यमबाट त्यसको समाधान गर्ने परियोजनाहरू तयार परेका थिए ।
विद्यार्थीहरूले आवश्यकता परेको खण्डमा रगत व्यथापन गर्नेदेखि पुरानो पुस्तक किनबेच, मोबाइल एपबाट सार्वजनिक यातायातको टिकेट बुकिङ लगायतका परियोजनाहरू बनाएको कलेजकी प्रतिनिधि काजल सिंहले जानकारी दिइन् । पढेको कुरालाई वास्तविक जीवनमा लागू गर्दै जटिल समस्याको समाधान खोज्ने सिकाउने उद्देश्यका साथ कार्यक्रम आयोजना गरिएको सिंहले बताइन ।
उनले भनिन्, ‘पहिलो सेमेस्टरदेखि अन्तिम सेमेस्टरमा पढ्ने विद्यार्थीसम्मको सहभागिता गराएर हामीले उनीहरूबिचको घनिष्ठता बढाउने काम पनि गर्यौँ र त्यसको साथै उनीहरूले दैनिक रूपमा कक्षाकोठा भित्र पढ्ने विषयलाई कसरी गर्ने भनेर पनि सिकायौँ । यसरी हामीले उनीहरूलाई अहिलेदेखि नै उद्यमी बन्न सिकाइरहेका छौँ ।’
