वीरगन्ज । पर्साको सखुवा प्रसौनी गाउँपालिकाका अध्यक्ष यसवन्त यादव, प्रहरी निरीक्षक ९इन्सपेक्टर० प्रदीप पौडेलसहित पक्राउ परेका आठै जनामाथि अनुसन्धान गर्न जिल्ला प्रशासन कार्यालय पर्साले ६ दिनको म्याद थप गरेको छ।
वीरगन्जको गण्डकस्थित क्लार्क रिसोर्टमा सञ्चालित गोल्डेन फिगर क्यासिनोबाट नियन्त्रणमा लिइएका उनीहरूमाथि मुलुकी अपराध संहिताबमोजिम गैरकानुनी जुवा तथा सट्टेबाजीसम्बन्धी कसुरमा अनुसन्धान अघि बढाइएको प्रहरीले जनाएको छ।
प्रहरीको विशेष टोलीले क्यासिनोभित्र नेपाली नागरिक प्रवेश गरी जुवा खेलिरहेको अवस्थामा उनीहरूलाई रंगेहात नियन्त्रणमा लिएको दाबी गरेको छ। पक्राउपछि घटनासँग सम्बन्धित विभिन्न दाबी तथा तर्कहरू सार्वजनिक भइरहेका छन्। प्रहरीले भने यस्ता दाबीले अनुसन्धानलाई विषयान्तर गर्ने तथा अनुसन्धान प्रक्रियालाई प्रभावित पार्ने प्रयास हुन सक्ने आशंका गरेको छ।
सखुवा प्रसौनी गाउँपालिकाका अध्यक्ष यादव क्यासिनोमा जुवा खेल्न नभई इन्सपेक्टर पौडेलको पटक–पटकको फोनपछि मात्रै त्यहाँ पुगेको र आफू पुगेको करिब १९ मिनेटमै प्रहरीको छापा परेको दाबीसमेत सार्वजनिक भएको छ। यद्यपि, प्रहरीले घटनाको वास्तविकता अनुसन्धानबाटै स्पष्ट हुने जनाएको छ।
कानुन कार्यान्वयन गराउने निकायका अधिकारीका अनुसार नेपाली नागरिकलाई क्यासिनो प्रवेश गरी जुवा खेल्न प्रतिबन्ध रहेको अवस्थामा जनप्रतिनिधि र प्रहरी अधिकृतसमेत एकै स्थानमा भेटिनु आफैंमा गम्भीर विषय हो। त्यसैले घटनाको सम्पूर्ण पक्षमाथि निष्पक्ष अनुसन्धान आवश्यक रहेको उनीहरूको भनाइ छ।
अदालतबाट अनुसन्धानका लागि म्याद थप भइसकेकाले प्रहरीले घटनासँग सम्बन्धित सीसीटीभी फुटेज, कल डिटेल रेकर्ड ९ऋम्च्०, क्यासिनोभित्रको गतिविधि तथा पक्राउ परेका व्यक्तिहरूको भूमिकालगायतका विषयमा सूक्ष्म अनुसन्धान गर्ने जनाएको छ।
जिल्ला प्रहरी कार्यालय पर्साले कुनै पनि प्रकारको दबाब, प्रभाव वा भ्रामक प्रचारबाट अनुसन्धान प्रभावित नहुने स्पष्ट पारेको छ। घटनाको सत्यतथ्य पत्ता लगाई कानुनबमोजिम निष्पक्ष अनुसन्धान अघि बढाइने प्रहरीले जनाएको छ।
