काठमाडौं। भारतको उत्तर प्रदेशस्थित बहराइच जिल्लामा फेरि चितुवाको आतंक देखिएको छ।
कतर्नियाघाट वन्यजन्तु डिभिजन अन्तर्गतको एक गाउँमा घरभित्र पसेको चितुवाले एक महिलामाथि आक्रमण गरेको छ।
वन डिभिजनका प्रमुख (डीएफओ) अपूर्व दीक्षितका अनुसार घटना बिहीबार र शुक्रबारको मध्यरातमा सुजौली रेञ्ज अन्तर्गतको धनिया बेली गाउँमा भएको हो।
जयप्रकाशकी २६ वर्षीया पत्नी लाली देवी आफ्नी सानी छोरीसँग घरमा सुतिरहेकी थिइन्। त्यही बेला चितुवा घरभित्र पसेर उनीमाथि एक्कासि आक्रमण गरेको थियो।
आक्रमणपछि लाली देवीले आफ्नी छोरी र आफ्नो ज्यान बचाउन करिब पाँच मिनेटसम्म चितुवासँग संघर्ष गरेकी थिइन्। उनको चिच्याहट सुनेर परिवारका अन्य सदस्य जागेपछि ठूलो स्वरले कराउँदै चितुवालाई भगाउने प्रयास गरेका थिए। त्यसपछि चितुवा जंगलतर्फ भागेको थियो।
आक्रमणमा घाइते भएकी लाली देवीलाई स्थानीय अस्पतालमा भर्ना गरिएको छ। घटनाको जानकारी पाएपछि वन विभागको टोली घटनास्थल पुगेको थियो।
वन अधिकृत अनिल पटेलले घाइते महिलाको परिवारलाई तत्काल तीन हजार भारतीय रुपैयाँ आर्थिक सहायता प्रदान गरेका छन्।
डीएफओ दीक्षितका अनुसार चितुवाको खोजीका लागि क्षेत्रमा कम्बिङ अभियान तीव्र पारिएको छ। स्थानीय बासिन्दालाई सतर्क रहन, विशेषगरी साँझपख एक्लै बाहिर ननिस्कन वन विभागले आग्रह गरेको छ।
चितुवाको आक्रमणपछि गाउँमा त्रास फैलिएको छ। मे महिनामा पनि आमाले चितुवासँग जुधेर छोराको ज्यान बचाएकी थिइन्
यसअघि २०–२१ मे मा पनि कतर्नियाघाट वन्यजन्तु डिभिजनमै यस्तै घटना भएको थियो।
तेलियनपुरवा गाउँमा मीना देवी आफ्ना ६ वर्षीय छोरा मोहितसँग सडक किनारमा बसेकी बेला उखुबारीबाट निस्किएको चितुवाले बालकमाथि आक्रमण गरेको थियो।
त्यसपछि मीना देवीले चितुवासँग प्रत्यक्ष जुधेर आफ्नो छोरालाई बचाएकी थिइन्। घटनामा उनी गम्भीर रूपमा घाइते भएकी थिइन् भने उनका छोरालाई सामान्य चोट लागेको थियो।
स्थानीयवासी लाठी बोकेर घटनास्थलमा पुगेपछि चितुवाले बालकलाई छोडेर उखुबारीतर्फ भागेको थियो। उक्त घटनामा उमेश नामका २६ वर्षीय स्थानीयवासी पनि घाइते भएका थिए।
प्रत्यक्षदर्शीका अनुसार, ‘धेरै मिनेटसम्म एक आमा र चितुवाबीच संघर्ष चल्यो, तर उनले एकपटक पनि हिम्मत हारिनन्।’
