वीरगञ्ज। वीरगञ्ज महानगरपालिका वडा नं। २४ को आर्थिक सहयोग तथा एडरोबोटिक्सको प्राविधिक सहकार्यमा सामुदायिक विद्यालयका विद्यार्थीहरूका लागि एकमहिने विज्ञान तथा प्रविधि तालिम श्री शारदा माध्यमिक विद्यालय, बहुअरीमा सञ्चालन गरिएको छ।
विद्यार्थीहरूमा विज्ञान, प्रविधि, नवप्रवर्तन तथा सिर्जनशील सोचको विकास गर्ने उद्देश्यले सञ्चालन गरिएको उक्त कार्यक्रमले उनीहरूको शैक्षिक तथा व्यावहारिक क्षमताको अभिवृद्धिमा महत्वपूर्ण योगदान पुग्ने विश्वास गरिएको छ।
विद्यालयका प्रधानाध्यापक अनिल कुमार वर्णवालको अध्यक्षतामा आयोजित उद्घाटन कार्यक्रममा वडा अध्यक्ष विजय पटेल प्रमुख अतिथिका रूपमा सहभागी भएका थिए। कार्यक्रममा वडा सदस्य सीता देवी र सदाम हुसेन, वडा सचिव सतिश श्रीवास्तव, सहायक सचिव सुरज यादवलगायतको उपस्थिति रहेको थियो।
तालिममा सिद्धार्थ पटेल, लालबाबु गिरी तथा दिनेश महतोले प्रशिक्षक तथा सहजकर्ताको भूमिका निर्वाह गरिरहेका छन्।
कार्यक्रममा वक्ताहरूले विज्ञान तथा प्रविधिको तीव्र विकास भइरहेको वर्तमान युगमा विद्यार्थीहरूलाई व्यावहारिक ज्ञान, अनुसन्धानमुखी सोच तथा आधुनिक सीपसँग जोड्न यस्ता तालिमहरू अत्यन्त आवश्यक रहेको बताएका थिए। उनीहरूले यस्ता कार्यक्रमले विद्यार्थीहरूलाई भविष्यका चुनौती सामना गर्न सक्षम बनाउने विश्वास व्यक्त गरे।
सामुदायिक विद्यालयका विद्यार्थीहरूलाई गुणस्तरीय, व्यावहारिक तथा समयानुकूल शिक्षा प्रदान गर्ने उद्देश्यले सञ्चालन गरिएको यस तालिमले दक्ष र प्रतिस्पर्धी जनशक्ति उत्पादनमा टेवा पुग्ने अपेक्षा गरिएको छ।
स्थानीय तह र निजी क्षेत्रबीचको सहकार्यमा सञ्चालन भएको यस पहललाई शिक्षाको गुणस्तर सुधार तथा विद्यार्थीहरूको क्षमता अभिवृद्धितर्फको सकारात्मक र उदाहरणीय कदमका रूपमा हेरिएको छ।
कार्यक्रमको सञ्चालन शिक्षक यज्ञराज सापकोटाले गरेका थिए।
