वीरगञ्ज — वीरगञ्ज महानगरपालिकाले सञ्चालन गरिरहेको “क्षयरोगमुक्त वीरगञ्ज अभियान” अन्तर्गत वडा नं। २५ को सिर्सिया स्वास्थ्य चौकीमा बिहीबार क्षयरोग खोजी तथा परीक्षण शिविर सम्पन्न गरिएको छ।
शिविरमा एआई प्रविधियुक्त एक्सरे सेवामार्फत करिब २०० जनाको स्वास्थ्य परीक्षण गरिएको महानगरपालिकाले जनाएको छ। परीक्षणका क्रममा ५० जनामा क्षयरोगको आशंका देखिएपछि थप पुष्टि गर्न उनीहरूको खकार परीक्षणका लागि पठाइएको छ।
महानगरपालिकाका स्वास्थ्य शाखा प्रमुख राजु साहका अनुसार समुदायस्तरमै पुगेर क्षयरोगको पहिचान, परीक्षण र उपचारलाई प्रभावकारी बनाउने उद्देश्यले अभियान सञ्चालन गरिएको हो।
उनले प्रारम्भिक अवस्थामै रोग पहिचान गरी उपचार प्रक्रिया सुरु गर्न सकिए क्षयरोग नियन्त्रणमा ठूलो सहयोग पुग्ने विश्वास व्यक्त गरे।
महानगरपालिकाले पछिल्लो समय प्रविधिमैत्री स्वास्थ्य सेवामार्फत संक्रामक रोग नियन्त्रणलाई प्राथमिकतामा राख्दै विभिन्न वडामा नियमित परीक्षण अभियान सञ्चालन गर्दै आएको छ।
