वीरगञ्ज — मधेस विश्वविद्यालयमा कार्यरत एक कर्मचारीले छात्रामाथि अनैतिक सम्बन्धका लागि दबाब दिएको आरोपमा पक्राउ परेका छन्। अस्वीकार गरेमा परीक्षामा अङ्क घटाउने र स्वीकार गरेमा सुविधा दिने प्रलोभन देखाएको आरोप उनीमाथि लागेको छ।
जिल्ला प्रहरी कार्यालय पर्साका अनुसार आरोपित कर्मचारी मोहम्मद राजु राउत गद्दीले सुरुमा सहयोगको बहानामा छात्रासँग सम्पर्क बढाएका थिए।
पछि फोन तथा सामाजिक सञ्जालमार्फत अनुपयुक्त सन्देश पठाउँदै निरन्तर मानसिक दबाब सिर्जना गरेको र प्रस्ताव अस्वीकार गरेपछि शैक्षिक भविष्य प्रभावित पार्ने चेतावनी दिएको आरोप छ।
पीडित छात्राले दिएको उजुरीका आधारमा चैत १४ गते जिल्ला प्रशासन कार्यालय पर्सामा मुद्दा दर्ता भएको थियो। उजुरीपछि फरार रहेका उनलाई प्रहरीले खोजतलासका क्रममा नियन्त्रणमा लिएको हो।
पर्सा प्रहरीका प्रवक्ता प्रहरी नायब उपरीक्षक हरिबहादुर बस्नेतले आरोपितमाथि आवश्यक कानुनी प्रक्रिया अघि बढाइएको र घटनाको विस्तृत अनुसन्धान भइरहेको जानकारी दिए।
