वीरगञ्ज — राष्ट्रिय ज्योतिष दिवस २०८२ को अवसरमा वीरगञ्जस्थित श्री गहवा माई मन्दिर परिसरमा एक भव्य सम्मान तथा विचार गोष्ठी कार्यक्रम सम्पन्न भएको छ। कार्यक्रमको आयोजना विश्व ज्योतिष महासंघका एसिया उपसभापति तथा बृहस्पति फाउन्डेसन नेपालका अध्यक्ष, सुप्रसिद्ध ज्योतिषाचार्य डा. पुरुषोत्तम दुबेले गर्नुभएको हो।
कार्यक्रममा प्रमुख अतिथिका रूपमा स्नेही नेपाल सामाजिक संस्थाका अध्यक्ष भुपेन्द्र पौडेलको उपस्थिति रहेको थियो। सम्बोधनका क्रममा पौडेलले हाम्रो मौलिक धर्म, संस्कृति तथा खगोल विज्ञानको संरक्षणका लागि यस्ता कार्यक्रमले समाजमा सकारात्मक ऊर्जा प्रवाह गर्ने विश्वास व्यक्त गर्नुभयो।
विशिष्ट व्यक्तित्वहरू सम्मानित
समारोहमा सनातन संस्कृति, धर्म तथा ज्योतिष शास्त्रको संरक्षणमा योगदान पुर्याउने विभिन्न व्यक्तित्वहरूलाई ‘सम्मान पत्र’ प्रदान गरिएको थियो। सम्मानित हुनेहरूमा नेपाल भोजपुरी समाजका अध्यक्ष धुर्व सिंह ठकुरी, संस्कृत पाठशाला वीरगञ्जका प्राचार्य पं. विजय नाथ तिवारी तथा हिन्दू पत्रकार संघ परिवारका अध्यक्ष राजन रौनियार रहनुभएको थियो।
त्यसैगरी, महिला सशक्तिकरण तथा समाजसेवामा सक्रिय राधा शर्मालाई विशेष सम्मान प्रदान गरिएको थियो। साथै, राजन तिवारी, पण्डित जटाशंकर तिवारी (गुरुकुल आश्रम), अपाङ्ग कल्याण संघका अध्यक्ष संजय सर्राफ तथा देश मधेश अनलाइनका संचालक अभिलाष गुप्तालाई पनि सम्मान गरिएको थियो।
महिला सहभागिता र उत्साहजनक उपस्थिति
कार्यक्रममा सिमा दुबे, विभा साह र स्वस्तिका चौधरी लगायतका महिला व्यक्तित्वहरूको उल्लेखनीय उपस्थिति रहेको थियो, जसले कार्यक्रमलाई थप प्रभावशाली बनाएको थियो।
आयोजक डा. दुबेले सम्मानित व्यक्तित्वहरूको ज्ञान, साधना र समर्पणले ज्योतिष विद्याको विकासमा महत्वपूर्ण योगदान पुग्ने विश्वास व्यक्त गर्नुभयो। कार्यक्रममा स्थानीय बुद्धिजीवी, सञ्चारकर्मी तथा श्रद्धालुहरूको उत्साहजनक सहभागिता रहेको थियो।
समारोहको समापनसँगै सहभागीहरूले सम्मानित व्यक्तित्वहरूको सुस्वास्थ्य, दीर्घायु र उज्ज्वल भविष्यको कामना गरेका थिए।
