काठमाडौँ। अख्तियार दुरुपयोग अनुसन्धान आयोगले रौतहटको कटहरिया नगरपालिकाका तत्कालीन निमित्त प्रमुख प्रशासकीय अधिकृत रामप्रकाश साहसहित ७ जनाविरुद्ध विशेष अदालतमा भ्रष्टाचार मुद्दा दायर गरेको छ।
जनचेतनामूलक डकुमेन्ट्रीको नाममा १० लाख हिनामिना
आर्थिक वर्ष २०७७र७८ मा नगरपालिकाको जनचेतनामूलक डकुमेन्ट्री निर्माण गर्ने बहाना बनाई सरकारी रकम झण्डै १० लाख रुपैयाँ हिनामिना गरेको आरोपमा मंगलबार मुद्दा दायर गरिएको अख्तियारले जनाएको छ।
उजुरीका आधारमा गरिएको अनुसन्धानमा, नगरपालिकाले वार्षिक कार्यक्रम र बजेट स्वीकृति नै बिना, बदनियतपूर्ण रूपमा ‘सरिता फाउन्डेसन’ नामक संस्थासँग डकुमेन्ट्री निर्माणको सम्झौता गरेको खुलेको छ।
सम्झौताअनुसारको जनचेतनामूलक डकुमेन्ट्री बनाउनुको साटो मेयरको प्रशंसा मात्र रहेको भिडियो तयार गरिएको, त्यो भिडियो कहीं पनि प्रसारण नगरिएको, र नक्कली कागजात बनाई करिब ९,९८,९२१ रुपैयाँ भुक्तानी गरेर भ्रष्टाचार गरेको अख्तियारले उल्लेख गरेको छ।
७ जनामाथि मुद्दा — बिगो बराबर जरिवाना र कैद माग
मुद्दा दायर गरिएका व्यक्तिहरूः
रामप्रकाश साह — तत्कालीन निमित्त प्रमुख प्रशासकीय अधिकृत
विवेक कुमार सहनी — लेखापाल
राम नरेश प्रसाद यादव — सहायकस्तर कर्मचारी
उमेश कुमार दास तत्मा — सहायकस्तर कर्मचारी
कौशल किशोर चौधरी — खरिदार
छोटेलाल मिश्र — खरिदार
सरिता कुमारी साह — निर्देशक, सरिता फाउन्डेसन
अख्तियारका अनुसार, उनीहरू सबैविरुद्ध ९,९८,९२१ रुपैयाँ बिगो कायम गर्दै सोही अनुपातमा जरिवाना र कैद सजाय मागदाबी गरिएको छ।
