वीरगन्ज । पर्सा प्रहरीले ठूलो परिमाणमा लागुऔषध—गाँजा तथा चरेस—सहित तीन जनालाई पक्राउ गरेको छ।
जिल्लाको पटेर्वासुगौली गाउँपालिका क्षेत्रबाट १०४ किलोभन्दा बढी गाँजा सहित दुई जनालाई पक्राउ गरिएको प्रहरीले जनाएको छ। साथै वीरगन्ज महानगरपालिकाको प्रतिमा चौक नजिक शंकास्पद रूपमा हिँडिरहेका एक व्यक्तिलाई रोकेर तलासी गर्दा उनको हातमा रहेको कालो प्लास्टिकको झोलाभित्र टेपले बेरिएको अवस्थामा १० किलो चरेस फेला परेपछि प्रहरीले उनलाई समातेको हो।
गाँजासहित पक्राउ पर्नेहरूमास्
भिम स्याङ्तान (२२ वर्ष), भिमफेदी गाउँपालिका–८, मकवानपुर
कुमार स्याङ्तान (२८ वर्ष), मकवानगञ्ज नगरपालिका–७, मकवानपुर
चरेससहित पक्राउ परेका व्यक्ति
सम्सुल मियाँ, धोबनी गाउँपालिकाका निवासी
पर्साका प्रहरी प्रमुख सुदिपराज पाठकका अनुसार जिल्ला प्रहरी कार्यालयको विशेष टोलीले कारवाही गर्दै गाँजा बरामद गरेको हो। साथै बीएबी ९३९८ नम्बरको स्विफ्ट कार समेत नियन्त्रणमा लिइएको छ। कारको जाँच गर्दा भित्र लुकाइ–छिपाइ गरी राखिएका करिब १० पोका गाँजा फेला परेको प्रहरीले जनाएको छ।
बरामद गरिएको गाँजा, कार र चरेससहित समातिएका मियाँलाई आवश्यक कानुनी कारबाहीका लागि जिल्ला प्रहरी कार्यालय पर्सामा बुझाइएको प्रहरीले जनाएको छ।
घटनाबारे थप अनुसन्धान जारी रहेको पनि प्रहरीले जानकारी दिएको छ।
