वीरगन्ज। वीरगन्जको भन्सार क्षेत्र नजिकै प्रहरीले स्रोत नखुलेको नेपाली १० लाख रुपैयाँसहित एक भारतीय नागरिकलाई पक्राउ गरेको छ। पक्राउ पर्ने व्यक्ति भारत बिहार, मोतिहारी–रक्सौल निवासी ५३ वर्षीय सुरेन्द्र साह हुन्।
साह सीमापारी रक्सौलबाट वीरगन्जतर्फ आउँदै गरेका बेला उनी चढेको मधेस प्रदेश ०३–०२५ प ९८०७ नम्बरको मोटरसाइकललाई प्रहरी अनुसन्धान टोलीले वीरगन्ज–१६, रजत जयन्ति चोकमा रोक दिएको थियो। चेकजाँचका क्रममा मोटरसाइकलको एयर फिल्टरभित्र लुकाइ राखिएको रकम फेला परेको पर्साका डिएसपी हरिबहादुर बस्नेतले जानकारी दिए।
बरामद रकममध्ये
१,००० रूपैयाँ दरका ७०० थान,
५०० रूपैयाँ दरका ६०० थान
रहेका थिए—जसको कूल रकम १० लाख रुपैयाँ भएको प्रहरीले जनाएको छ।
साहले रकमको स्रोत खुलाउन नसकेपछि उनलाई नगद र मोटरसाइकलसहित नियन्त्रणमा लिइएको डिएसपी बस्नेतले बताए। बरामद रकम अवैध हुण्डी कारोबारसँग सम्बन्धित रहेको प्रारम्भिक अनुमान छ। पक्राउ परेका साहलाई प्रहरी हिरासतमा राखेर थप अनुसन्धान जारी छ।
