वीरगंज – जनता समाजवादी पार्टी (जसपा) पर्सा जिल्ला समितिद्वारा वीरगंजस्थित टाउनहलमा एक भव्य “अगुवा कार्यकर्ता भेला” कार्यक्रम सम्पन्न गरिएको छ।
कार्यक्रमका प्रमुख अतिथि तथा जसपाका केन्द्रीय सदस्य एवं पूर्व खानेपानी मन्त्रीले पार्टी सुदृढीकरण, आगामी रणनीति र जनसेवामूलक कार्यमा कार्यकर्ताको भूमिका महत्वपूर्ण हुने उल्लेख गर्दै संगठन एकता, अनुशासन र सक्रिय जनसम्पर्कमा जोड दिनु भयो।
विशिष्ट अतिथिका रूपमा वीरगंज महानगर प्रमुख राजेशमान सिंह, जिल्ला समन्वय समिति प्रमुख अजय सर्राफ, पार्टीका केन्द्रीय सदस्यहरू पुरुषोत्तम लाल झा, मोहनलाल चौधरी, जनार्दन यादव, जनत अंसारी, सलमा खातुन, मधु माया यादव लगायत विभिन्न नेताहरूको उपस्थिति रहेको थियो।
कार्यक्रम जसपा पर्सा जिल्ला अध्यक्ष सिंघासन साह तेलीको अध्यक्षतामा सम्पन्न भएको हो। अध्यक्ष साहले हालको राजनीतिक परिस्थितिमा पार्टीलाई जनस्तरमा सशक्त बनाउँदै जनसमस्या समाधानमा अग्रसर बन्नुपर्ने आवश्यकता औंल्याए।
कार्यक्रममा वक्ताहरूले जसपाले सामाजिक न्याय, समानता र समृद्धिको मार्गमा अग्रसर भूमिका निर्वाह गर्दै आएको उल्लेख गर्दै सबै कार्यकर्तालाई एकजुट भई पार्टीका नीतिलाई जनतासम्म पुर्याउन आग्रह गरे।
भेलामा संगठन विस्तार, युवा परिचालन, जनसेवा र आगामी कार्यक्रमबारे विस्तृत छलफल गरिएको थियो। सहभागी कार्यकर्ताहरूले पार्टीप्रति पूर्ण आस्था व्यक्त गर्दै संगठन सुदृढीकरणमा निरन्तर योगदान दिने प्रतिबद्धता जनाएका थिए।
