पर्सा ।
उपकार सेवा नेपालले ठोरी गाउँपालिका–१, भगवाननगरस्थित वृद्ध–वृद्धा आश्रममा आश्रित अपाङ्ग, सुस्त मानसिक अवस्था भएका व्यक्ति, वृद्ध–वृद्धा, आमा–बुबा तथा बालबालिकासहित १७ जनाका लागि दैनिक उपभोग्य सामग्री हस्तान्तरण गरेको छ।
सधैंझैं नियमित रुपमा हुँदै आएको मासिक सहयोग कार्यक्रम अन्तर्गत आश्रमलाई चामल, पिठो, दाल, खानेतेल, नुन, बिस्कुट, चिउरा, भुजा, चना, टूथब्रश, टूथपेस्ट, लुगाधुने साबुन, नुहाउने साबुन, सर्फ, डायपर, धनिया, खुर्सानी, बेसारलगायतका खाद्यान्न र आवश्यक सामग्री उपलब्ध गराइएको हो।
एक विशेष कार्यक्रममा आश्रमका सदस्य रामबहादुर थिङलाई बोलाएर संस्थाकी अध्यक्ष विद्या कुमारी सरावगी, अभिभावक पद्मा देवी सरावगी र सामाजिक अभियन्ता प्रकाश थारुले सामाग्री हस्तान्तरण गरेका हुन्।
संस्थाले आश्रमलाई आवश्यक उपभोग्य सामग्री प्रत्येक महिना नियमित रूपमा उपलब्ध गराउँदै आएको र यसले आश्रममा बसोबास गर्ने आश्रितहरूलाई जीवनयापनमा ठूलो सहयोग पुर्याएको जनाएको छ।
