वीरगञ्ज, पर्सा।
वीरगञ्ज उद्योग वाणिज्य सङ्घको महिला उद्यमशीलता विकास समितिले आगामी भदौ १४ गते (शनिवार) भव्य रूपमा “बृहत् महिला सम्मेलन २०८२” आयोजना गर्ने भएको छ। सम्मेलनको मुख्य उद्देश्य पर्सा–बारा क्षेत्रका विभिन्न क्षेत्रहरूमा सक्रिय महिलाको सामाजिक पहिचान उजागर गर्ने रहेको आयोजक समितिले जनाएको छ।
वीरगञ्ज उद्योग वाणिज्य सङ्घको सभाहलमा आयोजना हुने कार्यक्रममा नेपालकी पूर्व राष्ट्रपति विद्यादेवी भण्डारी प्रमुख अतिथिका रूपमा सहभागी हुने तय भएको छ।
कार्यक्रम अन्तर्गत “नारी शक्ति, समर्पण र सम्मान” विषयमा कार्यशाला गोष्ठी तथा प्यानल छलफलहरू संचालन गरिनेछ।
महिलाको योगदानलाई सम्मान
सम्मेलनमा उद्योग, व्यापार, शिक्षा, स्वास्थ्य र सामाजिक सेवाजस्ता क्षेत्रहरूमा उल्लेखनीय योगदान पुर्याएका करिब ३०–४० जना प्रेरणादायी महिलाहरूलाई विशेष सम्मान गरिनेछ।
त्यस्तै, राष्ट्रियस्तरमा स्थापित महिलाहरूको सहभागितामा विभिन्न विधामा प्यानल छलफल पनि गरिने कार्यक्रम संयोजक निरज अग्रवालले जानकारी दिएका छन्।
उद्यमशीलता र नेतृत्व क्षमताको प्रवर्द्धन
महिला उद्यमशीलता विकास समितिकी संयोजक डा. लक्ष्मी थापाका अनुसार, सम्मेलनको उद्देश्य महिला नेतृत्व विकास, उद्यमशीलतामा सहभागिता अभिवृद्धि, र समाजमा महिलाको पहिचानलाई सशक्त बनाउने रहेको छ।
“कार्यक्रममार्फत सहभागी महिलाहरूलाई उद्यमशीलता, सामाजिक सेवा र राष्ट्र निर्माणमा अझ सक्रिय र प्रेरित गराउने लक्ष्य लिएको छ,” उनले बताइन्।
पत्रकार सम्मेलनमार्फत जानकारी
आज वीरगञ्जमा आयोजित पत्रकार सम्मेलनमार्फत कार्यक्रमबारे जानकारी दिइएको हो। पत्रकार सम्मेलनमा कार्यक्रम संयोजक निरज अग्रवाल, सह–संयोजक अनुप अग्रवाल, संयोजक डा. लक्ष्मी थापा, संघका अध्यक्ष हरिप्रसाद गौतम, विभिन्न महिला नेतृहरू तथा पदाधिकारीहरूको उपस्थिति रहेको थियो।
कार्यक्रममा नेपाल रेडक्रस सोसाइटीकी गुडि साहले स्वागत मन्तव्य दिएकी थिइन् भने नेपाल पत्रकार महासंघ पर्साका अध्यक्ष ओमप्रकाश खनालले आसन ग्रहण गरेका थिए।
