वीरगञ्ज — नेशनल मेडिकल कलेज प्रा. लि., बीरगञ्ज र हुलास आइरन इन्डस्ट्रीज लिमिटेड तथा हुलास इन्फ्रा लिमिटेड बीच आज एक आपसी समझदारीपत्र (MOU) मा हस्ताक्षर भएको छ। यस सम्झौताको उद्देश्य हुलास कम्पनी समूहका कर्मचारी तथा उनीहरूका प्रत्यक्ष आश्रितहरूलाई गुणस्तरीय, सुलभ तथा नगदरहित स्वास्थ्य सेवा प्रदान गर्नु रहेको छ।
नेशनल मेडिकल कलेजको दर्ता कार्यालय, वीरगञ्ज–१५ मा सम्पन्न औपचारिक कार्यक्रममा अस्पतालका तर्फबाट निर्देशक डा. इशरत जहान अन्सारी, प्रमुख सूचना अधिकृत इञ्जिनियर प्रदीप चौधरी, मार्केटिङ म्यानेजर जितेश चन्द्र दास, र प्रशासनिक अधिकृत विश्वनाथ कान्त तथा हुलास आइरन र इन्फ्राका तर्फबाट वरिष्ठ मानव संसाधन प्रबन्धक गोकुल पौडेल र लेखा विभागका प्रतिनिधि मनोज पारिखको उपस्थिति थियो।
सम्झौता अनुसार, हुलास आइरन र हुलास इन्फ्राका सञ्चालक समिति सदस्य, स्थायी कर्मचारी र तिनका प्रत्यक्ष आश्रितहरू — बाबु–आमा, जीवनसाथी तथा दुई जना सन्तान — ले नेशनल मेडिकल कलेजमा नगदरहित सेवा प्राप्त गर्न सक्नेछन्।
यदि लाभार्थीहरू सामाजिक सुरक्षा कोष (SSF) मा आबद्ध छन् भने, सो कोषको समन्वयमा सेवा दिइनेछ। गैर–SSF लाभार्थीहरूलाई भने विभिन्न विशेष छुट प्रदान गरिने व्यवस्था गरिएको छ।
आपतकालीन अवस्थाहरूमा Guarantee of Payment (GOP) प्राप्त गरेपछि तुरुन्त सेवा प्रदान गरिने उल्लेख छ। साथै, औद्योगिक दुर्घटनासम्बन्धी उपचार, पूर्व–रोजगार स्वास्थ्य परीक्षण, वार्षिक स्वास्थ्य चेकअप, र त्रैमासिक निःशुल्क स्वास्थ्य शिविरहरू सञ्चालन पनि सम्झौतामा समावेश छन्।
सम्झौताको अवधि एक वर्षको हुनेछ र आवश्यकता अनुसार आपसी सहमतिमा नवीकरण गर्न सकिनेछ। दुवै पक्षले सेवा प्रदान तथा उपयोग गर्दा पारदर्शिता र गोपनीयताको सिद्धान्त पालना गर्ने प्रतिबद्धता जनाएका छन्।
नेशनल मेडिकल कलेजका प्रेस सल्लाहकार आशिक अन्सारीका अनुसार,
“यो सहकार्यले निजी क्षेत्रका कर्मचारी तथा परिवारजनलाई गुणस्तरीय स्वास्थ्य सेवा सुनिश्चित गर्न मद्दत गर्नेछ। साथै, उद्योग–स्वास्थ्य क्षेत्रबीचको सहकार्यलाई थप सुदृढ बनाउने विश्वास लिइएको छ।”
