वीरगंज — पर्सा जिल्लाको जगरनाथपुर गाउँपालिका–४ मा एक हृदयविदारक घटना घटेको छ, जहाँ २२ वर्षीया लालबाबु खातुनको आफ्नै श्रीमान् द्वारा घाँटी थिची हत्या गरिएको पुष्टि भएको छ। घटनामा संलग्न भनिएका खातुनका श्रीमान् सफी राज मियाँलाई प्रहरीले नियन्त्रणमा लिएको छ।
जिल्ला प्रहरी कार्यालय पर्साले आइतबार जारी गरेको प्रेस विज्ञप्तिमा उल्लेख गरिएअनुसार, २०८२ साल असार ७ गते राति करिब १२ः४५ बजे हत्या भएको हो। प्रहरी टोलीले घटनाको जानकारी पाउनासाथ स्थलमा पुगेर अनुसन्धान सुरु गरेको थियो।
मृतकको शव पोस्टमार्टमका लागि नारायणी अस्पताल, वीरगंज पठाइएको छ। प्रारम्भिक अनुसन्धानमा प्रहरीलाई प्राप्त विवरणअनुसार, श्रीमान–श्रीमतीबीचको पारिवारिक तनाव र घरेलु कलहले घटना घट्न पुगेको देखिएको छ।
प्रहरी स्रोतका अनुसार, पत्नी बाहिर काम गरेर घर ढिलो फर्कने, र आफूलाई बेवास्ता गरेको भन्दै विवाद चर्किएपछि मियाँले खातुनको घाँटी थिचेर हत्या गरेको स्वीकृति दिएका छन्।
घटनासँग सम्बन्धित थप तथ्य संकलन गर्नका लागि पर्सा जिल्ला अदालतबाट मियाँलाई पाँच दिनको म्याद लिएर अनुसन्धान अगाडि बढाइएको प्रहरी नायब उपरीक्षक तथा प्रवक्ता किशोर लम्सालले जानकारी दिए।
