वीरगंज, असार ७ — “हरियाली आज, सुरक्षित भोलि” भन्ने नारालाई आत्मसात् गर्दै, वीरगंज महानगरपालिका–११ अन्तर्गत श्री नेपाल राष्ट्रिय विद्यापीठ माध्यमिक विद्यालय, श्रीपुरको परिसर शनिबार बिहान वातावरणमैत्री ऊर्जा र हरित संकल्पले झकझकिएको थियो।
वडा नं। ११ को कार्यालयको संयोजन र सिवांश व्यवसायिक प्रा।लि।, जगरनाथपुर गा।पा।–६, पर्साको आयोजनामा सम्पन्न वृक्षारोपण कार्यक्रममा विभिन्न प्रजातिका १२० बिरुवाहरू रोपिए, जसले विद्यालयको खेलमैदानलाई जीवन्त हरियालीको स्पर्श दिएको छ।
नेतृत्व, शिक्षालय र समाजको सुदृढ सहकार्य
कार्यक्रम वडाध्यक्ष अजय कुमार बरैको अध्यक्षतामा र विद्यालय व्यवस्थापन समितिका अध्यक्ष सुन्दर कुर्मीको प्रमुख आतिथ्यतामा सम्पन्न भयो। कार्यक्रममा वडा सचिव उमेश शर्मा, वडा सदस्य मुस्किम हवारी, जगन लाल महतो, गौदमी देवी, साथै विद्यालयका शिक्षक बृजमोहन प्रसाद कानु, असलम अन्सारी, र आयोजक संस्थाका रामानन्द ठाकुरको सक्रिय सहभागिता रहेको थियो।
बोटसँगै बालबालिकामा आशा रोपियो
वृक्षारोपणमार्फत न केवल वातावरणीय सन्तुलनको सन्देश दिइयो, तर विद्यार्थीहरूमा प्रकृतिप्रतिको माया र संरक्षणको भावना पनि रोपिएको आयोजकको विश्वास छ। हरियालीले भरिएको विद्यालयको प्राङ्गण अब समुदायका लागि शिक्षा र संस्कारको साथसाथै स्वच्छ वातावरणको प्रतीक बन्नेछ।
