वीरगंजमा सामाजिक जागरूकता र नारी सुरक्षाका लागि नयाँ पहल गर्दै तेरापन्थ महिला मण्डलले शुक्रवार बिहान शंखधर साख्वा पार्कमा “आचार्य महाश्रमण कन्या सुरक्षा अभियान” को भव्य उद्घाटन कार्यक्रम सम्पन्न गरेको छ। यो अभियान नारी सुरक्षा, नैतिक शिक्षा र आत्मरक्षाको महत्वलाई समाजमा स्थापित गर्ने ऐतिहासिक कदम मानिएको छ।
कार्यक्रमका प्रमुख अतिथि वीरगंज महानगरपालिकाका मेयर राजेश मान सिंह थिए। साथै अखिल भारतीय तेरापन्थ महिला मण्डलकी राष्ट्रिय अध्यक्ष सरिता डागा, नेपाल स्तरीय जैन श्वेतांबर तेरापन्थी सभाका वरिष्ठ उपाध्यक्ष अशोक कुमार बैद, महिला मण्डलकी अध्यक्ष बबीता खटेड़ लगायत दर्जनौं गणमान्य अतिथिहरू उपस्थित थिए।
कार्यक्रमको सुरुवात सामूहिक “नमस्कार महामन्त्र” बाट भव्यताका साथ भएको थियो जसले आध्यात्मिक ऊर्जा फैलाएको थियो। तत्पश्चात् सबै अतिथिहरूलाई अंगवस्त्र ओढाएर स्वागत गरिएको थियो। उद्घाटन समारोहमा मेयर सिंहले अभियानलाई समाजका लागि उदाहरणीय पहल भने र नगरपालिकाबाट पूर्ण सहयोगको आश्वासन दिए।
वरिष्ठ उपाध्यक्ष बैदले कन्या मात्र परिवारको होइन, समाज र राष्ट्रको अमूल्य सम्पत्ति भएको औँल्याउँदै यो अभियान समाजका लागि अत्यावश्यक रहेको बताए। उनले भन्नुभयो, “जब समाजमा नारी सुरक्षाका चुनौतीहरू बढ्दैछन्, तब यस्ता जागरूक कार्यक्रमहरूले सामाजिक दायित्व निभाउन मद्दत गर्छन्।”
यो अभियानले आत्मरक्षा प्रविधि मात्र नभई नैतिक शिक्षा, आत्मविश्वास र चारित्रिक मजबुतीमा पनि बालिकालाई अगाडि बढाउने छ। सशक्त नारी भएको समाज नै समृद्ध र प्रगतिशील हुन्छ भन्ने सन्देश दिन्छ।
राष्ट्रिय अध्यक्ष सरिता डागाले तेरापन्थ महिला मण्डल देशभरि सामाजिक सुधार र नारी जागृतिका लागि निरन्तर क्रियाशील रहेको बताउँदै “आचार्य महाश्रमण कन्या सुरक्षा अभियान” एउटा महत्वपूर्ण आन्दोलन भएको र यसले बालिकाहरूलाई आत्मरक्षा, आत्मविश्वास र सशक्तीकरण प्रदान गर्ने बताइन्। उनले थपिन्, “यो अभियान केवल कार्यक्रम होइन, एक सोच र संस्कार हो जसले नारीहरूलाई कानूनी, सामाजिक र सांस्कृतिक रुपमा मजबूत बनाउनेछ।”
कार्यक्रमको संचालन हर्षिका भंसालीले गरिन् भने धन्यवाद ज्ञापन महिला मण्डलकी अध्यक्ष बबीता खटेड़ले गरिन्। खटेड़ले आगामी योजनाहरू साझा गर्दै अभियानलाई दीर्घकालीन प्रभाव दिने प्रतिबद्धता व्यक्त गरिन्।
यो अभियानले वीरगंज मात्र नभई नेपाल र भारतका अन्य क्षेत्रहरूमा पनि प्रेरणाको स्रोत बन्ने विश्वास गरिएको छ। तेरापन्थ महिला मण्डलको यो प्रयास महिलाहरूको सुरक्षा, आत्मनिर्भरता र सम्मानजनक जीवनका लागि नयाँ युगको सुरुवात हो।
