यातायात व्यवस्था कार्यालय कलैयाका एक कर्मचारीले जबरजस्ती ट्रायल परीक्षामा फेल गराएको भन्दै सेवाग्राहीले गुनासो गरेका छन्।
बारा, कलैया–९ रामपुर निवासी २९ वर्षीय अनिल साह कानुले असार ३ गते ट्रायल परीक्षा दिँदा एक अज्ञात कर्मचारीले जानबुझेर फेल गराएको आरोप लगाएका हुन्। उनका अनुसार, गंगापुर, कलैयास्थित ट्रायल सेन्टरमा उनले सम्पूर्ण आवश्यक परीक्षा प्रक्रिया पूरा गरे तापनि अन्त्यमा “पछाडि गर भाइ” भन्दै जबरजस्ती फेल गराउँदै सेन्टरबाट बाहिर निकालिएको थियो।
अनिल साहले सीसीटीभी फुटेजको आधारमा छानबिन गर्न माग गर्दै चालक अनुमति पत्रको आवेदनसँग सम्बन्धित कागजातसहित कार्यालयमा औपचारिक निवेदन दर्ता गराएका छन्। पहिले नै समूह ‘ए’ को लाइसेन्स भएका कानुले समूह ‘बी’ थप गर्न केही दिन अघि आवेदन दिएका थिए।
८ वर्षदेखि आफ्नै घरको सुमो गाडी चलाउँदै आएका अनुभवी चालक कानुले निष्पक्षता नपाएको भन्दै अन्याय भएको महसुस गरेका छन्।
यातायात व्यवस्था कार्यालय कलैयाका प्रमुख अविन्दर दासले भने, “निवेदन आएको छ, आवश्यक छानबिन गरी निष्कर्ष निकालिनेछ। पास भए पास र फेल भए फेल, तर निर्णय सीसीटीभी फुटेजको आधारमा नै गरिनेछ।” साभार घण्टाघर टिभी
