काठमाडौं– नेपाली कांग्रेसका नेता अफताब आलमलाई सफाइ दिने उच्च अदालत जनकपुरको अस्थायी इजलास वीरगन्जका दुई न्यायाधीश न्याय परिषदमा तानिएका छन्। न्यायाधीश खुसीराम थारु र अर्जुन महर्जनविरुद्ध न्याय परिषदमा उजुरी परेको थियो।
रौतहटको इट्टाभट्टा काण्डमा दोषी ठहर गर्दै जिल्ला अदालतले सर्वस्वसहित जन्मकैदको फैसला सुनाएको थियो। तर, गत जेठ १४ गते उच्च अदालतका थारु र महर्जनको इजलासले आलमलाई सफाइ दिएको निर्णय देशभर चर्चाको विषय बनेको थियो।
यसपछि मृतक पिन्टु त्रिलोक सिंहका पिता श्रीनारायण सिंह लगायतका पीडितले न्याय परिषदमा उजुरी दिएका थिए। न्याय परिषदको बिहीबार बसेको बैठकले एक सदस्यीय छानबिन समिति गठन गर्दै थारु र महर्जनलाई कार्यक्षेत्रबाट तानेको हो।
यसअघि वरिष्ठतम न्यायाधीश सपना प्रधान मल्लले पनि दुवै न्यायाधीशलाई सुरक्षा कारण देखाउँदै परिषदमा तान्नुपर्ने प्रस्ताव राखेकी थिइन्, जुन तत्कालीन प्रधानन्यायाधीश प्रकाशमान सिंह राउत र कानूनमन्त्री अजय चौरसियाले अस्वीकार गरेका थिए।
न्यायाधीशद्वयमाथि नेकपा निकट कार्यकर्ताले इजलासमै कालोमोसो दलेर दुव्र्यवहार गरेको घटनाले पनि थप विवाद चुलिएको थियो।
