रौतहट, कटहरिया नगरपालिका–५ — गत बैशाख २८ गते छोरी सानिया प्रविनको हत्या प्रकरणमा पीडित पक्षले प्रहरी र स्थानीय नेताहरूको दबावमा अनुसन्धान प्रभावित पार्ने र दोषीलाई उन्मुक्ति दिन खोजिएको आरोप लगाएका छन्।
नेपाल पत्रकार महासंघ, पर्सामा आयोजित पत्रकार सम्मेलनमा मृतक सानियाका मामा अरमान अंसारीले सासू, ससुरा र ज्वाइँ मिलेर हत्या गरेको तथा अर्की भान्जीलाई पनि हत्या गर्ने धम्की दिएको बताए।
सानिया प्रविनको मागी विवाह भएको थियो र माइती पक्षको दाबी छ कि केटा पक्षले मागेको दाइजो नदिँदा उनीमाथि चरम मानसिक र शारीरिक यातना दिइ हत्या गरिएको हो।
सानियाका दाजु साहबाज रौशनले प्रहरीले उनीहरूको गुनासो नसुनेको र अनुसन्धानबारे कुनै जानकारी नदिएको गुनासो गरे। उनीहरूले केटा पक्षबाट आर्थिक प्रलोभन र धम्की समेत आएको बताए।
रौशनले भने,
“हामी कसैलाई फसाउन खोजिरहेका छैनौं। सत्य र तथ्यमा आधारित निष्पक्ष अनुसन्धानको पक्षमा छौं। तर स्थानीय नेता र प्रहरी प्रशासन यसलाई आत्महत्या देखाउन खोज्दैछन्।”
पीडित पक्षले न्यायको माग गर्दै छानबिन र कारबाहीको गम्भीर माग राखेको छ।
