पर्सा — गर्मीका कारण खानेपानीको चरम अभाव भइरहेको बेला वीरगन्ज महानगरपालिका वडा नम्बर ७ का वडा अध्यक्ष हिराकाजी महर्जनमाथि पानीलाई व्यक्तिगत र राजनीतिक स्वार्थका लागि दुरुपयोग गरेको गम्भीर आरोप लागेको छ।
वडावासीहरू आक्रोशित हुँदै भन्छन्, “जनताले पानी नपाएर हैरान भइरहँदा अध्यक्षले आफ्ना निकटस्थलाई मात्र पाइप जोडेर सुविधा दिएका छन्।”
वडामा विगतमा सर्वसाधारणको सुविधाका लागि जडान गरिएका बोरिङ अहिले अध्यक्ष महर्जनले आफ्नो दल, कार्यकर्ता र आसेपासेहरूको घरमा मात्र जोडिदिएको आरोप छ। २०८४ को निर्वाचन लक्षित गर्दै राजनीतिक प्रभाव जमाउने उद्देश्यले यस्तो कदम चालेको जनआक्रोश चुलिएको छ।
नाम नखुलाउने शर्तमा एक स्थानीयले भने, “वडाध्यक्षको यस्तो असमान व्यवहार जनविरोधी छ, सामान्य जनता पानीका लागि दिनभर कष्ट भोगिरहेका छन्।”
अवैधानिक जडानबारे वडा अध्यक्ष हिराकाजी महर्जनलाई प्रतिक्रिया लिन खोज्दा पटकपटक सम्पर्क गर्दा पनि फोन नउठेको कारण उनको धारणा लिन सकिएको छैन।
स्थानीयहरूमा वडाध्यक्षप्रति ठूलो असन्तुष्टि र आक्रोश देखिएको छ। यो घटनाले वडामा जनविश्वास गुम्ने खतरा बढाएको भन्दै सर्वसाधारणले तत्काल निष्पक्ष छानबिनको माग गरेका छन्।
