जनकपुरधाम – लगातार बढ्दो गर्मीले जनकपुरका विद्यालयहरू दुई दिनका लागि बन्द गरिएका छन्। जेठ २९ र ३० गते अत्यधिक गर्मीका कारण विद्यालय बन्द गर्ने निर्णय जनकपुरधाम उपमहानगरपालिकाले गरेको हो।
शिक्षा तथा खेलकुद विकास शाखाका प्रमुख धीरेन्द्र लाल कर्णले जानकारी दिएअनुसार, बालबालिकाको स्वास्थ्यमा गर्मीले प्रतिकूल असर पार्न थालेपछि बिदा दिनु परेको हो।
यसैबीच, मधेस प्रदेश सरकारले बुधबार (कबिर जयन्ती) का अवसरमा सार्वजनिक बिदा दिएकाले यस साता तीन दिन विद्यालय बन्द रहनेछ।
धनुषाको सबैला नगरपालिका–२ स्थित रामप्रसाद माध्यमिक विद्यालयमा मंगलबार अत्यधिक गर्मीका कारण २० जना विद्यार्थी बेहोस भएका थिए। तिनमध्ये ३ जनालाई उपचारका लागि अस्पताल भर्ना गरिएको थियो। उनीहरू अहिले खतरा मुक्त छन्।
जनकपुरमा गर्मीको अवस्था भयावह बनेको छ। मंगलबार तापक्रम ३९ डिग्री सेल्सियस पुगेको थियो भने बुधबार बिहानै तापक्रम ३४ डिग्री सेल्सियसभन्दा माथि पुगेको छ। तातो हावा र चर्को घामका कारण जनजीवन प्रभावित बनेको छ।
