मकवानपुर, २०८२ जेठ ६ —
मकवानपुर जिल्लाको भिमफेदी गाउँपालिका–९ स्थित त्रिभुवन राजपथ अन्तर्गत छैसठ्ठी मोडमा सोमबार दिउँसो करिब १:०५ बजे एक विङ्गर गाडी दुर्घटनामा परेको छ।
चित्लाङबाट बाराको लालबन्दीतर्फ जाँदै गरेको प्रदेश २-०३-००१ ज ०१४७ नम्बरको उक्त गाडी सडकबाट करिब २० मिटर तल खसेर सल्लाको रूखमा अड्किएको हो।
दुर्घटना सम्बन्धी जानकारी प्राप्त हुनासाथ इलाका प्रहरी कार्यालय भैसे, सिमभन्ज्याङ तथा अन्य निकायबाट खटिएको टोलीले तत्कालै उद्दार कार्य सुरु गरेको थियो। घाइतेहरुलाई तत्काल उद्धार गरी हेटौंडा अस्पताल पठाइएको मकवानपुर प्रहरीले जनाएको छ।
गाडीमा चालकसहित १४ जना सवार रहेका थिए, जस मध्ये ३ जनाको अवस्था गम्भीर रहेको बताइएको छ। प्रारम्भिक अनुसन्धान अनुसार, गाडीको ब्रेक फेल भएपछि दुर्घटना भएको प्रहरीको भनाइ छ।
घटनास्थलमा इलाका प्रहरी कार्यालय पालुङ, जिल्ला ट्राफिक प्रहरी कार्यालय मकवानपुर, र भिमफेदीबाट प्रहरी निरीक्षकको कमान्डमा २५ जना प्रहरी परिचालन गरिएको थियो।
घाइतेहरूको अवस्थाबारे थप जानकारी संकलन भैरहेको प्रहरीले जनाएको छ।
