वीरगञ्ज । तराई मधेशका जिल्लामा तीव्र रुपमा वन फडानी र अतिक्रमण हुने गरेको भए पनि पर्सामा भने कुल क्षेत्रफलको ५४।१८ प्रतिशत क्षेत्रफलमा वनजङ्गल रहेको डिभिजन वन कार्यालय, पर्साले जनाएको छ ।
डिभिजन वन प्रमुख सुनिल कर्णले पर्सा जिल्लाको कुल क्षेत्रफल एक लाख ३५ हजार १९७ हेक्टरमध्ये कृषि क्षेत्रभन्दा बढी वन क्षेत्र रहेको बताउनुभयो ।
उहाँले कृषि क्षेत्र ५४ हजार ४०६ हेक्टर अर्थात् ४०।२४ प्रतिशत रहेको तर वन क्षेत्र भने ७३ हजार २५० हेक्टर अर्थात् ५४।१८ प्रतिशत वन क्षेत्र रहेको बताउनुभयो । यसैगरी, चरण क्षेत्र दुई हजार ७७२ अर्थात् २।०५ प्रतिशत र अन्य क्षेत्र चार हजार ७६९ अर्थात् ३।५३ प्रतिशत रहेको उहाँले जानकारी दिनुभयो ।
जिल्लाको ७३ हजार २५० हेक्टर वन क्षेत्रमध्ये डिभिजन वन कार्यालय पर्सा मातहत ११ हजार ५२७।४७ हेक्टर मात्र रहेको र बाँकी पर्सा तथा चितवन राष्ट्रिय निकुञ्ज अन्तर्गत पर्ने प्रमुख कर्णले जानकारी दिनुभयो ।
