निजी तथा आवासीय विद्यालय अर्गनाईजेशन (प्याब्सन) पर्साको आयोजनामा अन्तर विद्यालय लोकनृत्य प्रतियोगिताको आयोजना हुने भएको छ ।
प्याब्सन पर्साले बुधबार वीरगञ्जको आदर्शनगर स्थित लिटिल एञ्जल स्कुलमा पत्रकार सम्मेलनको आयोजना गरेर कार्तिक ९ गते शुक्रबार वीरगन्जको नगरसभागृहमा अन्तर विद्यालय लोकनृत्य प्रतियोगिताको आयोजना गर्ने जानकारी दिएको हो ।
प्याब्सन जिल्ला अध्यक्ष पूरन प्रधान र वीरगन्ज महानगरका अध्यक्ष आलोक चौरसियाको संयुक्त अध्यक्षतामा भएको पत्रकार सम्मेलनमा प्याब्सन पर्साका प्रवक्ता अशोक संग्रौलाले प्रतियोगिताको बारेमा जानकारी गराउनु भएको थियो ।
प्याब्सनमा आवद्ध २३ वटा विद्यालयहरुले भाग लिने पत्रकार सम्मेलनमा जानकारी गराएको छ । प्रतियोगिता आयोजनामा ३ लाख १५ हजार रुपैंया खर्च हुने अनुमान पनि गरिएको प्रवक्ता संगौलाले बताउनुभयो ।
मधेसका लोकसंस्कृति,पहिरन र बाजगाजाको जगेर्ना र संरक्षण गर्दै सबै जातजातिबिचको सदभावलाई अझ मजबुत बनमउनुका साथै यसबारे बालबालिकालाईपनि जानकारी गराउने उदेश्यले लोकनृत्य प्रतियोगिता आयोजना गर्न लागिएको अध्यक्ष चौरसियाले पत्रकार सम्मेलनमा बताए ।
आधुनिक समाजमा पश्चिमा संस्कृतिप्रति युवाहरुको आकर्षण बढीरहेको र नेपाली लोकसंगीतप्रति युवाहरुको रुची घट्दै गईरहेको अवस्थामा यसलाई जोगाउनका लागि प्याब्सन पर्साले अन्तर विद्यालय नृत्य प्रतियोगिताको आयोजना गरेको जनाएको छ ।
प्रतियोगिताको प्रमुख अतिथि वीरगञ्ज महानगरपालिकाका नगर प्रमुख राजेशमान सिंहले उद्घाटन गर्ने कार्यक्रम रहेको छ ।
पत्रकार सम्मेलनमा प्याब्सन पर्साका बरिष्ठ उपाध्क्ष सरोज चौधरी, उपाध्यक्ष शिवजी गुप्ता, कोषाध्यक्ष रामकिशोर यादव लगायतको उपस्थिति रहेको थियो ।
