परवानीपुर — स्थानीय तहलाई नागरिकको नजिकको सरकार मानिन्छ। तर परवानीपुर गाउँपालिका–५ सानो नौतनका स्थानीय भने आफ्नै स्थानीय सरकारबाट लामो समयदेखि समाधान नभएको सडक तथा जलनिकासको समस्या लिएर संघीय सरकारको ध्यानाकर्षण गराउनुपर्ने अवस्थामा पुगेको बताए।
टोलको मुख्य प्रवेशद्वार र सहायक सडकमा तीन महिनादेखि पानी जमेको स्थानीयको गुनासो गरेका छन् । जलमग्न सडकका कारण दैनिक आवतजावतदेखि विद्यालय जाने बालबालिकासम्म प्रभावित भएको स्थानीयहरु बताउँछन्।
“हाम्रो आफ्नै वडा र गाउँपालिका छ। समस्या पनि यहीँका जनप्रतिनिधिलाई भनेका छौं। तर तीन महिनासम्म पनि बाटोको पानी निकास भएन। अब कसलाई गुहार्ने?” एक स्थानीयले प्रश्न गरेका थिए ।
स्थानीयका अनुसार पानी जमेको बाटो प्रयोग गर्दा खुट्टा चिलाउने, सुन्निने तथा फुल्ने समस्या देखिन थालेको छ। एलर्जीको औषधि सेवन गर्दै त्यही बाटो भएर आवतजावत गर्नुपरेको एक स्थानीय महिलाले बताइन्।
जलमग्न सडकका कारण बालबालिकालाई विद्यालय पठाउनसमेत कठिन भएको स्थानीय बचिया देवीले बताइन्। उनका अनुसार छोरीलाई नरसिंह स्कुल, पिपरा मठ जान जलमग्न बाटो छलेर पुरानो वडा नम्बर ९ हुँदै एकान्त नहरको पक्की सडक प्रयोग गर्नुपर्ने अवस्था छ।
“आफ्नै स्थानीय सरकार हुँदाहुँदै पनि हाम्रो समस्या समाधान भएन। अब संघीय सरकारको ध्यान जाओस् भन्ने चाहना हो,” स्थानीयको भनाइ रहेको छ।
स्थानीयले पानीको तत्काल निकास, सडक मर्मत र दीर्घकालीन जलनिकासको व्यवस्था गर्न माग गरेका छन्। साथै समस्या समाधानका लागि वडा तथा गाउँपालिकाले के पहल गरेको हो भन्नेबारे स्पष्ट जानकारी दिनुपर्ने उनीहरूको माग रहेको छ।
