वीरगन्ज, — वीरगन्ज महानगरपालिकाले बालबालिकाका लागि निर्माण गरिएको चिल्ड्रेन पार्कभित्र सञ्चालित होटलबाट हुक्का र सुर्तीजन्य पदार्थ बरामद गरेको छ।
महानगरपालिकाका कार्यवाहक प्रमुख इम्तियाज आलमको निर्देशनमा बुधबार वडा नं। ४ स्थित शङ्खधर साख्वा ९चिल्ड्रेन० पार्कभित्र सञ्चालित ुदियास हस्पिटालिटी प्रालिु मा नगर प्रहरीसहितको अनुगमन टोलीले छापा मारेको हो।
महानगरका अनुसार होटलको स्टोरमा गरिएको खानतलासीका क्रममा ४६ प्याकेट सूर्य चुरोट, ७० प्याकेट शिखर चुरोट, ८ वटा हुक्का स्ट्यान्ड र १७ प्याकेट विभिन्न फ्लेभरका हुक्का तथा सुर्तीजन्य पदार्थ बरामद गरिएको छ। बरामद सामग्री नियन्त्रणमा लिएर कानुनी प्रक्रिया अघि बढाइएको महानगरले जनाएको छ।
अनुगमन टोलीका अनुसार होटलको दर्ता र नवीकरणको अवस्था भने नियमित रहेको पाइएको छ। तर सार्वजनिक पार्क क्षेत्रभित्र सुर्तीजन्य तथा हुक्काजन्य पदार्थ भण्डारण र बिक्री–वितरण गरिएको भेटिएपछि कारबाही प्रक्रिया अघि बढाइएको हो।
कार्यवाहक प्रमुख आलमले बालबालिकाको मनोरञ्जनका लागि निर्माण गरिएको पार्कभित्र यस्ता गतिविधि हुनु गम्भीर विषय भएको बताए। बालबालिकाको स्वास्थ्यमा प्रतिकूल असर पर्ने गतिविधिमा संलग्न व्यक्ति वा व्यवसायलाई कानुनबमोजिम कडा कारबाही गरिने उनले चेतावनी दिए।
महानगरपालिकाले आगामी दिनमा पार्क, विद्यालय तथा सार्वजनिक क्षेत्र आसपास हुने यस्ता गैरकानुनी गतिविधि नियन्त्रण गर्न बजार अनुगमनलाई थप प्रभावकारी बनाइने जनाएको छ।
