वीरगञ्ज — वीरगञ्ज महानगरपालिका–१४ पिपरास्थित वडा समितिको कार्यालयमा बाटो निर्माणसम्बन्धी छलफलका क्रममा एक युवकमाथि कुटपिट भएको आरोप लागेको छ।
घटनामा घाइते भएका अनिल पटेल हाल वीरगञ्जस्थित एलएस न्युरो अस्पतालमा उपचाररत रहेको उनका परिवारजनले बताएका छन्।
पीडित पक्षका अनुसार बाटो निर्माणसम्बन्धी विषयमा छलफल गर्न वडा समितिबाट फोन गरेर पटेललाई कार्यालयमा बोलाइएको थियो। सोही क्रममा पूर्व वडा अध्यक्ष भरतप्रसाद कुर्मीका छोरा विशाल पटेलले उनीमाथि आक्रमण गरेको आरोप लगाइएको छ।
घटनाका बेला अनिल पटेल वडा सचिव राजेश डंगोल तथा कार्यवाहक वडाध्यक्ष देवकरण पटेलसँग छलफल गरिरहेका थिए। त्यसै क्रममा विशाल पटेलले एक्कासी मुक्का प्रहार गरी कुटपिट गरेको पीडित पक्षको दाबी छ। कुटपिटबाट पटेलको छाती, घाँटी, ढाड तथा कम्मरमा चोट लागेको बताइएको छ।
घटनापछि प्रहरी घटनास्थलमा पुगेर आवश्यक जानकारी संकलन गर्नुका साथै सीसीटीभी फुटेजसमेत हेरेको जनाइएको छ। पीडित पक्षले भने आरोपीलाई तत्काल नियन्त्रणमा नलिइएको भन्दै असन्तुष्टि जनाएको छ। उनीहरूले निष्पक्ष छानबिन गरी दोषीमाथि कानुनी कारबाही गर्न माग गरेका छन्।
घटनाबारे प्रहरीको औपचारिक धारणा सार्वजनिक हुन बाँकी छ। प्रहरीले घटनाको अनुसन्धान जारी रहेको जनाएको छ।
आरोपित पक्षको प्रतिक्रिया प्राप्त हुन नसकेको तथा घटनाबारे अनुसन्धान जारी रहेकाले यसको यथार्थ विवरण अनुसन्धानको निष्कर्षपछि मात्र स्पष्ट हुने देखिएको छ।
