वीरगंज — संविधान संशोधनका लागि सरकारले गठन गरेको “संविधान संशोधन बहशपत्र तयार कार्यदल” ले छलफलको दायरा विस्तार गर्दै थप २० जना जेनजी ९न्भल श्० युवालाई आमन्त्रण गरेको छ । उक्त सूचीमा पर्साका तीन युवा परेका छन् ।
प्रधानमन्त्रीका प्रमुख राजनीतिक सल्लाहकार असिम शाह नेतृत्वको कार्यदलले गत वैशाख ३० गते बसेको बैठकबाट विभिन्न जिल्लाका जेनजी युवासँग प्रत्यक्ष छलफल गर्ने निर्णय गरेको थियो । सोही निर्णयअनुसार पर्साबाट जेनजी अभियन्ता विशेष साह, अधिवक्ता अनिल साह र अर्जुन साह छनोटमा परेका हुन् ।
कार्यदलका सदस्य–सचिव लिलाधर सुबेदीका अनुसार उनीहरुलाई शुक्रबार साँझ ५ बजे प्रधानमन्त्री तथा मन्त्रिपरिषद्को कार्यालय, सिंहदरबारमा हुने छलफल कार्यक्रममा सहभागी हुन आमन्त्रण गरिएको छ । छलफलमा सहभागी युवाले संविधान संशोधनसँग सम्बन्धित विषयमा आफ्ना धारणा, सुझाव तथा अनुभव प्रस्तुत गर्नेछन् ।
कार्यदलले संविधान संशोधनका लागि तयार पारिने बहशपत्रलाई थप समावेशी र समयानुकूल बनाउन युवापुस्ताको दृष्टिकोण संकलन गर्ने उद्देश्य राखेको जनाएको छ । विशेषगरी जेनजी पुस्ताको राजनीतिक सहभागिता, समावेशिता, अधिकार सुनिश्चितता, सुशासन तथा राज्य संरचनासम्बन्धी दृष्टिकोणलाई बहशपत्रमा समेट्ने तयारी गरिएको सदस्य–सचिव सुबेदीले बताए ।
उनका अनुसार पछिल्लो समय युवापुस्तामा संविधान, लोकतन्त्र, संघीयता र राज्य सञ्चालनका विषयमा बढ्दो चासोलाई ध्यानमा राख्दै विभिन्न क्षेत्रका युवासँग चरणबद्ध रुपमा संवाद कार्यक्रम सञ्चालन भइरहेको छ । कार्यदलले यसअघि पनि विभिन्न विश्वविद्यालय, नागरिक समाज, कानुन व्यवसायी, विज्ञ तथा सरोकारवालासँग छलफल गरिसकेको जनाएको छ ।
संविधान संशोधनसम्बन्धी बहसलाई व्यापक र सहभागितामूलक बनाउन सरकारले देशका विभिन्न क्षेत्रका प्रतिनिधिसँग निरन्तर संवाद गरिरहेको छ । कार्यदलले प्राप्त सुझावका आधारमा संशोधनसम्बन्धी बहशपत्र तयार पारेर सरकारलाई बुझाउने तयारी गरेको बताइएको छ ।
