वीरगञ्ज । पर्सा जिल्लाको निर्वाचन क्षेत्र नम्बर–३ अन्तर्गत पर्ने बिन्दवासिनी गाउँपालिकामा नेकपा (एमाले) ले सञ्चालन गरेको घरदैलो तथा जनता दर्शन कार्यक्रम उत्साहपूर्ण रूपमा सम्पन्न भएको छ। कार्यक्रममा प्रतिनिधिसभा सदस्यका युवा उम्मेदवार रूपेश कुमार पाण्डेको पक्षमा उल्लेखनीय जनसहभागिता देखिएको छ।
बिन्दवासिनीका प्रसौनी, अमरपट्टी, मधवललगायतका विभिन्न टोलमा पुगेका उम्मेदवार पाण्डेलाई स्थानीय मतदाताले आत्मीय स्वागत गरेका थिए। घरदैलोका क्रममा मतदातासँग प्रत्यक्ष संवाद गर्दै पाण्डेले पर्सा–३ लाई आर्थिक, सामाजिक तथा पूर्वाधार विकासको दृष्टिले अघि बढाउने आफ्नो योजना साझा गरेका छन्।
कार्यक्रममा युवाहरू, महिला समूह तथा ज्येष्ठ नागरिकहरूको सक्रिय सहभागिता देखिएको थियो। सहभागीहरूले रोजगारी सृजना, कृषि आधुनिकीकरण, शिक्षा र स्वास्थ्य सेवाको पहुँच विस्तार तथा स्थानीय उद्योग–व्यवसाय प्रवर्द्धन जस्ता विषयलाई महत्वपूर्ण एजेन्डाका रूपमा उठाउँदै स्पष्ट दिशानिर्देशनसहितको नेतृत्व आवश्यक रहेको धारणा व्यक्त गरेका थिए।
यसपटक पर्सा–३ मा पुस्तान्तरणको बहस पनि चुनावी माहोलको प्रमुख विषय बनेको देखिन्छ। लामो समयदेखि परम्परागत नेतृत्व हाबी रहेको क्षेत्रमा युवा उम्मेदवारको सक्रियता र निरन्तर जनसम्पर्कले चुनावी वातावरणलाई नयाँ गति दिएको स्थानीयहरूको भनाइ छ। पाण्डे पछिल्ला वर्षहरूमा क्षेत्रीय गतिविधिमा सक्रिय रहँदै आफूलाई परिवर्तन र नयाँ सोचको प्रतिनिधिका रूपमा स्थापित गर्न प्रयासरत देखिन्छन्।
घरदैलो कार्यक्रमकै क्रममा स्थानीय बासिन्दाहरूले विकासप्रति प्रतिबद्ध, सहज पहुँचयोग्य र जवाफदेही नेतृत्वको आवश्यकता औंल्याउँदै आगामी निर्वाचनमा पाण्डेलाई समर्थन गर्ने संकेत गरेका थिए।
समग्रमा बिन्दवासिनी क्षेत्रमा देखिएको जनसक्रियता र चासोलाई आधार मान्दा पर्सा–३ को चुनावी प्रतिस्पर्धा थप रोचक बन्दै गएको देखिन्छ। राजनीतिक दलहरू र स्थानीय विश्लेषकहरूका अनुसार नेकपा (एमाले) प्रति बढ्दो विश्वास र युवा उम्मेदवारप्रति देखिएको समर्थनले यस क्षेत्रको निर्वाचन परिणाम निर्णायक मोडतर्फ अग्रसर हुँदै गएको संकेत गर्दछ।
