वीरगञ्ज। राष्ट्रिय स्वतन्त्र पार्टी (रास्वपा) का पर्सा निर्वाचन क्षेत्र नम्बर २ बाट प्रतिनिधिसभा सदस्य पदका उम्मेदवार सुशील कुमार कानुले आइतबार पर्सागढी नगरपालिका–९ का बडेर्वा र तेलिया तथा वडा नम्बर ७ को फुलवारीयामा घरदैलो कार्यक्रम सम्पन्न गरेका छन् ।
घरदैलोका क्रममा उनले मतदातासँग भेटघाट गर्दै आफ्नो चुनावी एजेन्डाबारे जानकारी गराए । उनले घण्टी छापमा मतदान गरेर भ्रष्टाचारमुक्त देश निर्माणको अभियानमा सहयोग गर्न आग्रह गरे ।
कानुले देशमा प्रजातन्त्र स्थापनादेखि नै विभिन्न राजनीतिक दलहरूले भ्रष्टाचार गरेर मुलुकको अर्थतन्त्रलाई धराशायी बनाएको आरोप लगाए । उनले अब परिवर्तनको समय आएको भन्दै मुलुकलाई सही बाटोमा डोर्याउन घण्टी छापमा मतदान गर्न आह्वान गरे ।
उनले क्षेत्रमा दीर्घकालीन रूपमा देखिँदै आएका समस्या, तिनका कारण र सम्भावित समाधानबारे स्थानीयसँग खुला छलफल गरे । निर्वाचित भएपछि महिलाहरूलाई घरमै बसेर सिक्न सकिने प्राविधिक योग्यतासहितका कृषि तथा पशुपालन तालिम, सिलाइ–कटाइ जस्ता सीपमूलक तालिम सञ्चालन गर्ने प्रतिबद्धता जनाए । “यस्ता तालिमले महिलाहरूलाई आत्मनिर्भर बनाउने र पारिवारिक आम्दानी बढाउन टेवा पुग्नेछ,” उनले भने।
स्थानीय बासिन्दाले वर्षौँदेखि भोग्दै आएको कृषि क्षेत्रमा जङ्गली जनावरबाट हुने क्षतिको समस्या उठाएका थिए । कानुले समस्याको समाधानका लागि प्रभावकारी नीति बनाउने, उचित क्षतिपूर्तिको व्यवस्था गर्ने तथा दीर्घकालीन कार्यक्रम अघि बढाउने प्रतिबद्धता व्यक्त गरे । “किसानको पसिनाको सम्मान हुने व्यवस्था गर्न म सदनमा निरन्तर आवाज उठाउनेछु,” उनले भने ।
कार्यक्रममा सहभागी स्थानीयवासीले कानुलाई नयाँ सोच, स्पष्ट योजना र जनताको समस्या प्रत्यक्ष सुन्ने उम्मेदवारका रूपमा चित्रण गर्दै यसपटक परिवर्तनका लागि रास्वपालाई अवसर दिनुपर्ने धारणा राखेका थिए ।
