पर्सा — पर्सा निर्वाचन क्षेत्र नम्बर २ अन्तर्गत वीरगञ्ज महानगरपालिका वडा नम्बर १९ को बिन्दवासनी टोलमा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार सुशील कुमार कानु ले घरदैलो कार्यक्रम सम्पन्न गरेका छन्। चुनावी सरगर्मी बढ्दै जाँदा आयोजित उक्त कार्यक्रममा स्थानीय जनसमुदायको उल्लेख्य सहभागिता देखिएको थियो।
घरदैलोका क्रममा बिन्दवासनी टोलका युवा, ज्येष्ठ नागरिक, महिला तथा स्थानीय समर्थकहरूले उम्मेदवार कानुलाई अबिर, गम्छा र फूलमालाले भव्य स्वागत गरेका थिए। टोल–टोलमा पुगेका कानुले मतदातासँग प्रत्यक्ष संवाद गर्दै क्षेत्रका समस्या, आवश्यकता र सम्भावनाबारे छलफल गरेका थिए।
कार्यक्रममा बोल्दै कानुले कृषि, शिक्षा, स्वास्थ्य र पूर्वाधार विकासलाई आफ्नो प्रमुख प्राथमिकता रहेको स्पष्ट पारे। “जनताको आधारभूत आवश्यकतामा केन्द्रित कार्यक्रम ल्याउनेछु,” उनले भने, “स्थानीय तहदेखि संघीय तहसम्मको समन्वयमा योजनाबद्ध विकास अघि बढाइनेछ।”
कृषि क्षेत्रका समस्या औँल्याउँदै उनले किसानले समयमै मल नपाउँदा उत्पादनमा असर परिरहेको भन्दै मलको सुनिश्चित व्यवस्थापन गर्ने प्रतिबद्धता जनाए। साथै, युवाहरूलाई रोजगारीमुखी तथा सीपमूलक तालिम प्रदान गरी स्थानीय स्तरमै रोजगारीका अवसर सिर्जना गर्ने योजना पनि सार्वजनिक गरे। “युवाले आफ्नै गाउँ–ठाउँमा काम पाउने वातावरण बनाउन सके वैदेशिक रोजगारीको बाध्यता घट्छ,” उनले भने।
स्थानीयवासीहरूले लामो समयदेखि शिक्षा, स्वास्थ्य सेवा, सडक र खानेपानीजस्ता आधारभूत पूर्वाधारमा अपेक्षित सुधार नआएको गुनासो गरेका थिए। जवाफमा कानुले निर्वाचित भएपछि जनताको आवाज संसद्मा पुर्याउने र विकासका सवालमा परिणाम देखिने गरी काम गर्ने प्रतिबद्धता दोहोर्याए।
घरदैलो कार्यक्रममा सहभागी स्थानीय युवाहरूले ‘परिवर्तनको समय आएको’ भन्दै रास्वपाप्रति आकर्षण बढ्दै गएको प्रतिक्रिया दिएका थिए। ज्येष्ठ नागरिक र महिलाहरूले पनि यसपालिको निर्वाचनमा सोचविचार गरेर मतदान गर्ने बताउँदै सुशासन र जवाफदेहितामा जोड दिएका थिए।
बिन्दवासनी टोलमा सम्पन्न घरदैलो कार्यक्रमले पर्सा–२ मा रास्वपाप्रति बढ्दो जनसमर्थन र परिवर्तनको अपेक्षा झल्काएको छ।
