पर्सा — पर्सा निर्वाचन क्षेत्र नम्बर २ अन्तर्गत पर्ने पर्सागढी नगरपालिकामा राजनीतिक समीकरणमा उल्लेखनीय परिवर्तन देखिएको छ। २०७९ सालको स्थानीय तह निर्वाचनमा जनता समाजवादी पार्टी नेपाल (जसपा नेपाल) बाट पर्सागढी नगरपालिकाको मेयर पदका उम्मेदवार बनेका सुरज मानन्धरसहितका प्रभावशाली नेताहरू नेपाली कांग्रेस मा प्रवेश गरेका छन्।
बुधबार जनकपुर मा आयोजित नेपाली कांग्रेसको प्रतिज्ञा सभाका क्रममा मानन्धरसहित विभिन्न दल परित्याग गरी आएका नेताहरूले औपचारिक रूपमा कांग्रेस प्रवेश गरेका हुन्। उनीहरूले पर्सा क्षेत्र नम्बर २ बाट प्रतिनिधिसभा सदस्यका कांग्रेस उम्मेदवार अजयकुमार चौरसिया लाई समर्थन जनाउँदै पार्टी प्रवेश गरेका थिए।
सुरज मानन्धर २०७९ को स्थानीय तह निर्वाचनमा जसपा नेपालका तर्फबाट पर्सागढी नगरपालिकाको मेयर उम्मेदवार बनेका थिए। उनले उक्त निर्वाचनमा २ हजार ६ सय ८४ मत प्राप्त गर्दै तेस्रो स्थान हासिल गरेका थिए। पर्सागढी क्षेत्रमा प्रभावशाली नेताका रूपमा परिचित मानन्धरको कांग्रेस प्रवेशलाई राजनीतिक वृत्तमा अर्थपूर्ण रूपमा हेरिएको छ।
कांग्रेस प्रवेश गर्ने अन्य नेताहरूमा पर्सागढी नगरपालिका वडा नम्बर ४ का जसपा नेपालबाट निर्वाचित वडाध्यक्ष शेख खुर्सेद, वडा नम्बर १ मा जसपा नेपालबाट वडाध्यक्ष पदका उम्मेदवार बनेका विकास दास, वडा नम्बर २ का वडाध्यक्ष पदका उम्मेदवार मदन चौधरी, जसपाका नेताहरू रामकिशोर चौधरी, मंगल लामा र रवि स्याङ्बो पनि रहेका छन्।
कार्यक्रममा उनीहरूलाई नेपाली कांग्रेसका सभापति गगन थापा, उपसभापति विश्वप्रकाश शर्मा, साथै कांग्रेस उम्मेदवार चौरसियालगायतका नेताहरूले खादा लगाएर पार्टीमा स्वागत गरेका थिए।
प्रतिज्ञा सभालाई सम्बोधन गर्दै कांग्रेस नेतृत्वले लोकतन्त्र, समावेशी विकास र सुशासनका लागि कांग्रेसको नेतृत्व अपरिहार्य रहेको उल्लेख गर्दै नयाँ प्रवेश गर्ने नेताहरूको भूमिकालाई पार्टीले सम्मानपूर्वक उपयोग गर्ने प्रतिबद्धता व्यक्त गरेको थियो।
पर्सागढी नगरपालिकामा जसपा नेपालका प्रभावशाली मानिने मानन्धरसहितका नेताहरूले पार्टी परित्याग गरी कांग्रेसमा प्रवेश गरेपछि पर्सा–२ मा कांग्रेस उम्मेदवार चौरसियाको चुनावी अभियान थप सशक्त बनेको आकलन गरिएको छ।
स्थानीय तहदेखि प्रभाव जमाएका नेताहरूको समर्थनले पर्सा–२ मा कांग्रेसको संगठनात्मक शक्ति र जनआधार बलियो हुने कांग्रेस नेताहरूको दाबी छ।
