पर्सा ।
पर्सा निर्वाचन क्षेत्र नं. २ अन्तर्गत बीरगंज महानगरपालिका वडा नं. १७ को अलौ टोलमा राष्ट्रिय स्वतन्त्र पार्टी (रास्वपा) ले प्रतिनिधिसभा निर्वाचनलाई लक्षित गर्दै सञ्चालन गरेको घरदैलो कार्यक्रम सम्पन्न भएको छ। कार्यक्रम जेष्ठ नागरिकबाट विजयको अग्रिम शुभकामना तथा जेन्जी युवाको उत्साहपूर्ण सहभागितासहित सौहार्दपूर्ण वातावरणमा सम्पन्न भएको हो।
घरदैलोका क्रममा स्थानीय जेष्ठ नागरिकहरूले परम्परागत दल र पुरानै नेतृत्वको भरमा अब अघि बढ्न नसकिने स्पष्ट सन्देश दिएका थिए। उनीहरूले देश र समाजको वास्तविक परिवर्तनका लागि युवा नेतृत्वसहित नयाँ सोच र नयाँ दलको आवश्यकता रहेको भन्दै रास्वपाप्रति समर्थन व्यक्त गरे। “अब पुरानै अभ्यास दोहोर्याएर हुँदैन, नयाँलाई अवसर दिनुपर्छ,” भन्ने नारा टोलभरि सुनिएको थियो।
कार्यक्रममा सहभागी स्थानीय अगुवाहरूले विगतमा पटक–पटक गणतन्त्र ल्याएको, सडक निर्माण गरेको जस्ता आश्वासनमा आफूहरू झुकाइए पनि यसपटक भने नझुकिने दृढ अडान व्यक्त गरे। उनीहरूले विकास र परिवर्तन केवल भाषणमा होइन, व्यवहारमा देखिनुपर्नेमा जोड दिए।
रास्वपाका प्रतिनिधिहरूले घरदैलोका क्रममा सुशासन, पारदर्शिता, व्यवहारिक विकास र नागरिकको प्रत्यक्ष सहभागितामूलक राजनीतिलाई आफ्नो मुख्य एजेन्डा रहेको बताए। स्थानीय आवश्यकता र जनताको प्राथमिकतालाई केन्द्रमा राखेर नीति निर्माण गर्ने प्रतिबद्धता व्यक्त गर्दै पुरानै शैलीको राजनीति तोड्ने समय आएको धारणा राखिएको थियो।
जेन्जी युवाहरूले पनि रोजगारी, शिक्षा, स्वास्थ्य र भविष्यप्रति बढ्दो अनिश्चितताप्रति चिन्ता व्यक्त गर्दै नयाँ राजनीतिक विकल्पको खोजी अपरिहार्य भएको बताएका थिए। जेष्ठ नागरिक र युवाबीच देखिएको साझा भावना रास्वपाको अभियानलाई थप बलियो बनाउने संकेतका रूपमा हेरिएको छ।
