वीरगञ्जमा बिन्दवासिनी माई टी–२० क्रिकेट प्रतियोगिता सुरु

वीरगञ्ज,— वीरगञ्ज महानगरपालिका–१९ मा श्री बिन्दवासिनी माई टी–२० नकआउट क्रिकेट प्रतियोगिता भव्य रूपमा उद्घाटन गरिएको छ।
प्रतियोगिताको उद्घाटन राष्ट्रिय स्वतन्त्र पार्टी (रास्वपा) का महाधिवेशन प्रतिनिधि तथा युवा नेता सुधिर पटेलले गरेका हुन्। उद्घाटन समारोहलाई सम्बोधन गर्दै उनले प्रतियोगिताको सफलताको शुभकामना व्यक्त गर्दै आयोजक श्री बिन्दवासिनी माई युवा क्लबलाई धन्यवाद तथा बधाई दिएका थिए।
पटेलले खेलकुदले युवालाई अनुशासित, स्वस्थ र जिम्मेवार नागरिक बनाउन महत्वपूर्ण भूमिका खेल्ने उल्लेख गर्दै यस्ता प्रतियोगिताले युवाबीच एकता, आपसी सद्भाव तथा सामाजिक रूपान्तरणमा सकारात्मक योगदान पु¥याउने विश्वास व्यक्त गरे।
कार्यक्रममा रास्वपाका वीरगञ्ज महानगर अध्यक्ष दिपराज पटेल विशिष्ट अतिथिका रूपमा सहभागी थिए। उनले स्थानीय तहमा खेलकुद गतिविधिको विस्तारले प्रतिभाशाली खेलाडी उत्पादन गर्न मद्दत पुग्ने बताउँदै आयोजकको प्रयासको प्रशंसा गरे।
आयोजकका अनुसार प्रतियोगितामा विभिन्न टोलीहरूको सहभागिता रहनेछ। प्रतियोगिताले स्थानीय खेल प्रतिभाको पहिचान तथा खेलकुद संस्कृतिको विकासमा टेवा पुग्ने अपेक्षा गरिएको छ।
उद्घाटन समारोहमा स्थानीय जनप्रतिनिधि, समाजसेवी, खेलप्रेमी तथा युवाहरूको उल्लेखनीय उपस्थिति रहेको थियो।