वीरगञ्ज — क्रियाशील युवा पत्रकार मञ्च वीरगञ्जले आफ्नो दोस्रो साधारणसभाको अवसरमा शिक्षा, उद्योग तथा सामाजिक क्षेत्रमा योगदान पुर्याउने संघसंस्था र व्यक्तित्वलाई सम्मान गरेको छ।
वीरगञ्जको शैक्षिक विकासमा उल्लेखनीय भूमिका निर्वाह गरेको भन्दै ५० वर्षभन्दा बढी इतिहास बोकेको गौतम माध्यमिक विद्यालयलाई कार्यक्रममा विशेष सम्मान गरिएको हो। उच्च अदालत जनकपुरको अस्थायी इजलास वीरगञ्जका मुख्य न्यायाधीश गोकर्ण डाँगीले विद्यालयका निर्देशक सोनाम लामालाई कदरपत्र प्रदान गर्दै सम्मान गरे।
मञ्चका अनुसार २०३३ सालमा स्थापना भएको गौतम माविले वीरगञ्जको शिक्षाक्षेत्रमा दीर्घकालीन र महत्वपूर्ण योगदान दिएको छ।
त्यसैगरी पेय पदार्थ उत्पादनमा सक्रिय उद्योग थाई एग्रो फुडलाई पनि कार्यक्रममा सम्मान गरिएको थियो। कम्पनीका प्रतिनिधि दीपेश न्यौपानेलाई प्रमुख अतिथि डाँगीले कदरपत्रसहित सम्मान प्रदान गरे।
कार्यक्रममा सहभागीहरूले शिक्षा र उद्योग क्षेत्रको विकासमा निजी तथा संस्थागत योगदानले समाज रूपान्तरणमा महत्वपूर्ण भूमिका खेल्ने धारणा व्यक्त गरेका थिए।
