वीरगञ्ज महानगरपालिका वडा नं. ३०, लालपर्सामा क्षयरोग (TB) पहिचान तथा रोकथामका लागि स्वास्थ्य स्क्रीनिङ कार्यक्रम सम्पन्न गरिएको छ।
वीरगञ्ज महानगरपालिका स्वास्थ्य शाखा तथा लालपर्सा स्वास्थ्य चौकीको संयुक्त आयोजनामा सम्पन्न कार्यक्रममा कुल १५२ जनाको स्वास्थ्य परीक्षण गरिएको थियो। स्क्रीनिङका क्रममा गरिएको छातीको एक्स–रे परीक्षणबाट २३ जना शंकास्पद बिरामी पहिचान भएका छन्।
थप परीक्षणका लागि उनीहरूको खकार (Sputum) नमुना संकलन गरिएको छ। संकलित नमुनामध्ये २० वटा नमुना AFB परीक्षण तथा ३ वटा नमुना GeneXpert परीक्षणका लागि पठाइएको जनाइएको छ।
समुदायमा क्षयरोगको समयमै पहिचान तथा उपचारमा सहयोग पुर्याउने उद्देश्यले सञ्चालन गरिएको कार्यक्रम प्रभावकारी भएको स्वास्थ्यकर्मीहरूले बताएका छन्। वीरगञ्ज महानगरपालिका स्वास्थ्य शाखा र लालपर्सा स्वास्थ्य चौकीले यस्ता जनस्वास्थ्य कार्यक्रमलाई आगामी दिनमा पनि निरन्तरता दिने जनाएको छ।
“समयमै परीक्षण गरौं, क्षयरोगबाट बचौं” भन्ने सन्देशसहित सम्पन्न कार्यक्रमले स्थानीय समुदायमा स्वास्थ्य सचेतना अभिवृद्धि गर्न सहयोग पुगेको विश्वास लिइएको छ।
