वीरगन्ज । गत भदौ २४ गते जेनजी आन्दोलनका क्रममा तोडफोड र आगजनीको शिकार बनेको वीरगन्ज महानगरपालिका–१४ स्थित गण्डक चोकको प्रहरी चौकी पुनः सञ्चालनमा ल्याउन विभिन्न संघसंस्थाले महत्वपूर्ण सहयोग गरेका छन्।
प्रहरी चौकीको पूर्वाधार पुनःस्थापना र सञ्चालनमा ल्याउन उत्कर्ष नेपाल, उपकार सेवा नेपाल र वीरगन्ज पब्लिक कलेजले संयुक्तरूपमा आवश्यक सामग्री उपलब्ध गराएका हुन्। ती संस्थाहरुले चौकीमा कुर्सी, टेवल, चापाकल, पानी तान्ने मोटर, बेडसिट, डसना, तकिया, र खाना पकाउने भाँडाकुँडा जस्ता दैनिक उपयोगका सामग्री प्रदान गरेका छन्।
उपकार सेवा नेपालकी अध्यक्ष विद्या कुमारी सरावगी, सदस्य सुमन बगेडिया, संरक्षक पद्मा देवी सरावगी, वीरगन्ज पब्लिक कलेजका सञ्चालक प्रा। डा। दीपक शाक्य, तथा उत्कर्ष नेपालका सदस्यहरुले सामग्री हस्तान्तरण गरेका थिए।
सामाजिक अभियन्ता प्रकाश थारुका अनुसार, प्रहरी चौकीको पुनः सञ्चालनका लागि गरिएको सहयोग सुरक्षाको पुनःस्थापना र समुदाय–प्रहरी सम्बन्ध मजबुत बनाउन एक सकारात्मक पहल हो।
