महानगरका ३२ वटै वडामा लामखुट्टे नियन्त्रणका लागि एयर स्प्रे सुरु

वीरगञ्ज
वीरगञ्ज महानगरपालिकाले लामखुट्टे नियन्त्रणका लागि हरेक दिन ‘एयर स्प्रे’ गर्न सुरु गरेको छ ।
जाडो मौसमको सुरुवातमा लामखुट्टेको प्रकोप बढ्ने भएकाले त्यसलाई नियन्त्रणका लागि महानगरले हरेक वार्डमा दैनिक तालिका बनाएरै बिहान बेलुका ‘एयर स्प्र’ गर्न सुरु गरेको हो ।
वीरगञ्जका मेयर राजेशमान सिंहले नगरवासीलाई लामखुट्टेको प्रकोपबाट बचाउन दैनिक तालिका बनाएर हरेक वडामा स्प्रे गर्ने व्यवस्था मिलाउन निर्देशन दिएका थिए । त्यही अनुरुप १५ गते मंगलबारबाटै स्प्रेको काम सुरु भएको छ ।
महानगरले कात्तिक १५ गतेदेखि तालिका नै बनाएर हरेक वार्डमा ऐयर स्प्रे गर्ने कामलाई तिब्रता दिएको छ । जस अनुसार बिहानको समयमा तीन राउण्ड र बेलुकाको समयमा २ राउण्ड स्प्रे गर्ने तालिका अनुसार महानगरका कर्मचारी स्प्रे गर्न खटिएका छन् ।
पहिलो दिन मंगलबार महानगरबाट आदर्शनगर, घडिअर्वा, माइस्थान, घण्टाघरहुँदै गण्डक र सिडियो कार्यालय, बसपार्क क्षेत्रमा स्प्रे गरिएको थियो । दोस्रो दिन बुधबार १ नम्बर रोड, २ नम्बर र ३ नम्बर रोडसहित नारायणी अस्पताल र भन्सार क्षेत्रमा स्प्रे गरेको छ । यस्तै बिहीबार वडा नम्बर १, २, ३ मा स्प्रे गर्ने काम भएको र यो अभियान ३२ वटै वडामा मंसिर १२ गतेसम्म चल्ने महानगरपालिकाका मेयर सिंहले जानकारी दिए ।
चिसो र गर्मी मौसम शुरु हुँदै गर्र्दा वीरगञ्जमा लामखुट्टेको अत्याधिक प्रकोप देखिन्छ । लामखुट्टे हुर्कन नदिन र हुर्किसकेकोलाई नियन्त्रण गर्न महानगरले औषधि छर्ने अभियान अघि बढाएको हो ।
लामखुट्टेको टोकाइबाट फैलिन सक्ने डेंगु, मलेरियाजस्ता प्राणघातक रोगको संक्रमण नियन्त्रण गर्न ३२ वटै वडामा ‘एयर स्प्रे’ सुरु गरिएको नगरप्रमुख सिंहले जानकारी दिए ।